Aleś Bialacki — u śpisie naminantaŭ na premiju «Indeksa cenzury»
Łaŭreaty vyznačacca na hetym tydni.
Paviedamleńnie pra heta źjaviłasia na sajcie brytanskaj arhanizacyi Index on Censorship («Indeks cenzury»).
«Aleś Bialacki źjaŭlajecca vybitnym pravaabaroncam, jaki pryśviaciŭ svajo žyćcio dapamozie achviaram parušeńniaŭ pravoŭ čałavieka ŭ Biełarusi», — havorycca ŭ paviedamleńni arhanizacyi.
Štohadovaja premija «Indeksa cenzury» sioleta budzie ŭručacca 13-y raz, łaŭreaty buduć uhanaravanyja ŭ naminacyjach «Žurnalistyka», «Ličbavaja svaboda», «Mastactva» i «Adstojvańnie pazicyi». Pretendentam na premiju mienavita ŭ apošniaj naminacyi źjaŭlajecca biełaruski pravaabaronca. Razam z Alesiem Bialackim na ŭznaharodu sioleta pretendujuć 15-hadovaja baraćbitka za prava na adukacyju Małała Jusafzaj z Pakistanu, moładzievy ruch Girifna z Sudanu i brytanskaja inicyjatyva Hillsborough Family Support Group.
«Sioletnija naminanty — heta ludzi, jakija prajavili nadzvyčajnuju mužnaść u vykazvańni svaich pohladaŭ, baraćbie z cenzuraj i niespraviadlivaściu, šmat chto ź ich robić heta ŭ vielmi skaładanych umovach», — adznačyła vykanaŭčy dyrektar «Indeksa cenzury» Kirści Chjuz.
Łaŭreaty premii buduć vyznačanyja na hetym tydni. Uhanaravańnie adbudziecca ŭ Łondanie 21 sakavika.
Index on Censorship — mižnarodnaja arhanizacyja sa štab-kvateraj u Łondanie, metaj jakoj źjaŭlajecca padtrymka svabody vykazvańnia. Arhanizacyja aktyŭna sočyć za situacyjaj u Biełarusi.
Kamientary