Aperacyja pa likvidacyi namiotavaha haradka na Kastryčnickaj płoščy i zatrymańnie i pahruzka ŭdzielnikaŭ pratestu doŭžyłasia nia bolš za hadzinu. A čaćviertaj ranicy apošni specyjalny hruzavik specnazu, u jakim znachodzilisia dziasiatki zatrymanych, padjechaŭ da varotaŭ Akreścina. Naš karespandent byŭ śviedkam, jak adtul vyhružali ŭdzielnikaŭ apazycyjnaj akcyi.
Milicyjanty kryčali na ich, brydka łajalisia, prymušali ich chutčej pakinuć aŭtazak.
U adnym aŭtazaku było pryblizna 50 čałaviek. Pakolki tut było šeść mašyn i jašče niekalki aŭtobusaŭ, to možna mierkavać, što lik zatrymanych idzie na sotni.
Za dźvie hadziny da razhonu žurnalisty pieraličyli ludziej u lahiery. Ich było kala 400 čałaviek.
Na miesca zatrymańnia adrazu prybyŭ Alaksandar Kazulin z žonkaj, a taksama jahony brat. Siarod zatrymanych – dva plamieńniki Alaksandra Kazulina, dziaciej jaho brata.
Spadar Kazulin ubačyŭ, što specaperacyjaj kiravaŭ namieśnik ministra ŭnutranych spravaŭ spadarom Filistovičam. Jon skazaŭ, što paśla takoha jon nikoli ŭ žyćci Filistoviču nie padaść ruki.
Kazulin ličyć, što ŭ biełaruskich uładaŭ, a kankretna ŭ Łukašenki, nia vytrymali nervy, i Łukašenka vyrašyŭ hvałtoŭna spynić akcyju pratestu da 25 sakavika, pakolki jon baicca masavaj akcyi pratestu.
(Kazulin: ) "Vidavočna, asabista ŭ Łukašenki zdali nervy. Niahledziačy na jaho zajavy, što jon budzie ciarpieć hetuju sytuacyju da kanca, pakul jany sami nie razyducca, bačna, ściarpieć jon nia zmoh. Jon baicca 25 sakavika.
Jon dziejničaje truśliva, cynična, iłžyva. Hetyja padziei adbylisia ŭ try hadziny nočy, kali samy mocny son i kali mienš za ŭsio śviedak. Naahuł, toje, što adbyvałasia na płoščy, va ŭsich krainach ličycca narmalnym i cyvilizavanym. Łukašenka jašče raz prademanstravaŭ, što my žyviem nie ŭ cyvilizavanaj krainie, a ŭ krainie, jakaja pad dyktaturaj."
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary