Nastaŭnik znakamitaha surka Fiła ŭziaŭ adkaznaść za doŭhuju zimu na siabie
Kiraŭnik zakrytaha kłuba nastaŭnikaŭ znakamitaha surka Fiła ŭziaŭ na siabie adkaznaść za zimu, jakaja nadta ŭžo zaciahnułasia. Bił Dzili, ciapierašni prezident Kłuba surka, zajaviŭ, što jon niapravilna zrazumieŭ pradkazańnie Fiła, jakoje toj pa tradycyi «prašaptaŭ» na vucha.
Zajavu ab nievinavataści Fiła Dzili zrabiŭ paśla taho, jak abvinavaŭca akruhi Batler, štat Ahajo, padpisaŭ žartoŭny śmiarotny prysud surku, jaki pamyliŭsia z prahnozam. Sprava ŭ tym, što 2 lutaha 2013 h, u Dzień surka, Fił zrabiŭ pradkazańnie ab tym, što amierykancaŭ čakaje rańniaja viasna, tady jak na samoj spravie ŭ ZŠA (i ŭ Biełarusi) zima zaciahnułasia.
Kali da druhoj pałovy sakavika nadvorje nie palepšyłasia, abvinavaŭca z Ahajo Majk Hmozier vyrašyŭ, što vinavaty ŭ hetym znakamity surok-pradkazalnik z Panksatoni, štat Piensilvanija.
U prysudzie Fiłu jon skazaŭ, što žyviolinka padviała ludziej i parušyła mir i spakoj u Ahajo, dzie ŭsio jašče chałodna, a ludzi tak i nie dačakalisia rańniaj viasny.
Nieŭzabavie paśla hetaha adzin z členaŭ kłuba surka Džon Hryfits vystupiŭ u abaronu hadavanca, zajaviŭšy, što Fił nie vinavaty ŭ zimie.Jon taksama nahadaŭ abvinavaŭcu, što praź niekalki dzion paśla zroblenaha surkom prahnozu nadvorje stajała dobraje, a ciapierašnija chałady źjaŭlajucca śledstvam prostaj vypadkovaści.
Dzień surka aficyjna adznačajecca ŭ ZŠA z 1886 hoda.
Kamientary