Hienkonsuł u Biełastoku: Kuplenyja šenhienskija vizy mohuć pryvieści da aryštu
Kuplenyja šenhienskija vizy mohuć pryvieści da aryštu ŭ krainie pryznačeńnia, paviedamiŭ hienieralny konsuł Respubliki Biełaruś u Biełastoku Alaksandr Bierabienia.
Apošnim časam u biełaruskaje dypłamatyčnaje pradstaŭnictva ŭ Biełastoku stali aktyŭna źviartacca hramadzianie Biełarusi z prośbaj dapamahčy razabracca ź situacyjami, źviazanymi z anulavańniem polskimi ŭładami viz na miažy, a taksama aryštami i zakryćciom dla ich ujezdu ŭ krainy Šenhienskaha pahadnieńnia.
«Našy suajčyńniki nie razumiejuć, za što ich abo ich rodnych niečakana viartajuć ź miažy, za što anulujuć vizy», — raspavioŭ surazmoŭca.
Pavodle słoŭ hienkonsuła Biełarusi, u pieršym kvartale hetaha hoda pavialičyłasia i kolkaść paviedamleńniaŭ u dyppradstaŭnictva ŭ Biełastoku z polskich kampietentnych orhanaŭ ab zatrymańniach, štrafach i navat aryštach hramadzian Biełarusi, jakija parušyli praviły pierasiačeńnia miažy.
«Bolšaja častka zatrymańniaŭ, a taksama vyniesienych sudovymi orhanami prysudaŭ adnosna našych hramadzian źviazana ź niametavym vykarystańniem viz abo atrymańniem polskich nacyjanalnych i šenhienskich viz padmannym šlacham,— adznačyŭ Alaksandr Bierabienia. — Hramadzianie nie razumiejuć u poŭnaj miery, što, kupiŭšy na vulicy zaprašeńnie dla afarmleńnia vizy, možna ŭžo na miažy trapić pad aryšt. Bo, padaŭšy ŭ dyppradstaŭnictvie Respubliki Polšča dakumienty dla afarmleńnia vizy, naprykład, z metaj pracaŭładkavańnia, možna atrymać tolki tak zvanuju pracoŭnuju vizu i naviedvać susiedniuju krainu ź inšymi metami na padstavie takoj vizy zabaroniena. Heta značyć, pa pakupki z takoj vizaj jechać nielha. Toje ž datyčyca pryvatnych abo dziełavych zaprašeńniaŭ. Vielmi časta biełarusy, aformiŭšy vizy na padstavie zaprašeńniaŭ z dalokich ad pryhraničča rehijonaŭ, nikoli nie dajazdžajuć da tych haradoŭ i viosak. Raźličvajučy, miarkujučy pa ŭsiamu, što polski bok heta nie pravieryć i pry čarhovym pašpartnym afarmleńni na hranicy nie zatrymaje». Bolš taho, zatrymańnie abo štraf moža być u adnosinach da biełaruskich hramadzian, jakija naviedvali Polšču na pastavie takich kuplenych zaprašeńniaŭ navat niekalki hadoŭ tamu: u sudach da hetaha času razhladajucca spravy minułych hadoŭ.
Pavodle słoŭ Alaksandra Bierabieni, u hienkonsulstva stali pastupać taksama paviedamleńni z polskich kampietentnych słužbaŭ ab strachavych polisach z vypraŭlenymi ŭ ich datami.Źjaŭlajucca taksama prablemy z čekami sistemy viartańnia padatku Tax Free, jakija našy suajčyńniki ŭ čarzie na hranicy za peŭnaje ŭznaharodžańnie pieradajuć trecim asobam dla nielehalnaha afarmleńnia. Adnak nie ŭsie razumiejuć, što takija parušeńni kvalifikujucca jak padroblivańnie dakumientaŭ i naležać da katehoryi kryminalnych złačynstvaŭ.
Biełaruskija dypłamaty nahadvajuć: niametavaje vykarystańnie viz, padrobka dakumientaŭ traktujecca zakanadaŭstvam Respubliki Polšča jak sproba niezakonnaha pierasiačeńnia miažy, a taksama pradastaŭleńnie zaviedama iłžyvaj infarmacyi słužbovym asobam, u hetym vypadku supracoŭnikam pahraničnaj słužby i konsułam Respubliki Polšča.
Heta moža pryvieści da sudovaha razboru navat biez udziełu hramadzianina Biełarusi i pakarańniu až da pazbaŭleńnia voli da troch hadoŭ i ŭniasieńniem u bazu asob, ujezd jakim u krainy Šenhienskaha pahadnieńnia zabaronieny.
Kamientary