Ciopłaje i siabroŭskaje pachmielle ad Mytnaha sajuza na samicie ŭ Astanie
Pasiadžeńnie Najvyšejšaj Jeŭrazijskaj ekanamičnaj rady adkryvajecca siońnia ŭ stalicy Kazachstana Astanie. Jahonym fonam stała rasčaravańnie ŭ Mytnym sajuzie. Naviazanaje Rasijaj intehracyjnaje abjadnańnie pryviało da spadu ŭ biełaruskaj pramysłovaści.
Tysiačy «lišnich» traktaraŭ MTZ u Minsku bolš niama kudy stavić, tamu ŭrad śpiešna raspracoŭvaje schiemu ich razdačy kałhasam. I traktarny zavod nie adzin taki. Dola hruzavikoŭ MAZ na rasijskim rynku źniziłasia ŭdvaja za adzin hod. Zusim advarotnaje adbyvajecca ź lehkavikami: ceny na aŭtarynku Ždanovičy stali zachmarnyja, bo abarončyja myty abmiažoŭvajuć pastupleńnie zachodniejeŭrapiejskich mašyn, a zavoz daloka nie pieradavych rasijskich marak raście. Jany ŭpieršyniu vyjšli ŭ lidary prodažaŭ na biełaruskim rynku.
Mytny sajuz akazaŭsia vyhadnym dla Rasii nie tolki palityčna i stratehična. U toj ža čas Minsk pieražyvaje pachmielle na čužoj biasiedzie. Nastupstvy dałučeńnia da Mytnaha sajuza akazalisia dla Minska siurpryzam. Intelektualny patencyjał łukašenkaŭskaj administracyi zanizki dla takoha prahnozavańnia.
Zaraz Biełaruś čakajuć niaprostyja pieramovy pa ŭstupleńni ŭ Suśvietnuju handlovuju arhanizacyju. Ź inšaha boku, Łukašenka nie hublaje nadziei atrymać ad Rasii novyja subsidyi, hetym razam ŭzamien za paniesienyja ad Mytnaha sajuza finansavyja straty. Ale suma rasijskich naftahazavych datacyj dasiahnuła rekordnych 10 miljardaŭ dalaraŭ, i, zdavałasia b, dzie ž užo bolej.
Na samicie ŭ Astanie miarkujecca pajści dalej, razhledzieć prajekt Damovy ab stvareńni Jeŭrazijskaha ekanamičnaha sajuza. Imavierna, Biełaruś pasprabuje zatarmazić čarhovy etap intehracyi ci, prynamsi, abstavić jaho takimi ŭmovami, jakija b harantavali dalejšaje pavieličeńnie naftahazavaj renty. Hałoŭnymi ž pytańniami, jakija Minsk budzie vyrašać, buduć budzionnyja spravy kštałtu prodažu MAZaŭ, hulniaŭ vakoł kaliju i, narešcie, padpisańnie naftavaha bałansu, ź jakim Maskva praciahvaje trymać biełarusaŭ na karotkim łancužku.
Kamientary