11 kastryčnika ŭ sudzie Zavodskaha rajona Minska pačaŭsia razhlad kryminalnaj spravy ŭ dačynieńni da Dźmitryja Halejeva, u kryminalnych kołach viadomaha jak złodziej u zakonie pa mianušcy Halej.
Pa chadajnictvie boku abvinavačańnia sud praniaŭ rašeńnie pravodzić praces u zakrytym režymie. Takoje rašeńnie pryniataje dla abarony intaresaŭ śviedak, piersony jakich lehiendavanyja (źmienienyja ich imiony, proźviščy, miescy pražyvańni i h.d.). Sam Dźmitryj Halejeŭ i jaho advakat vykazalisia suprać takoha rašeńnia suda.
Sprava ŭ dačynieńni da 38-hadovaha ŭradženca vioski Stańkava Dziaržynskaha rajona Minskaj vobłaści rasśledavałasia śledčym padraździaleńniem centralnaha aparata Śledčaha kamiteta.
Halejeŭ abvinavačvajecca va ŭčynieńni ŭ 2003 hodzie złačynstva, praduhledžanaha č. 3 art. 208 KK (vymahańnie ŭ składzie arhanizavanaj złačynnaj hrupy). Halejeŭ i jaho chaŭruśniki, pahražajučy žycharu Žodzina, patrabavali ŭ jaho 18 tysiač dołaraŭ. Troje vymahalnikaŭ byli zatrymanyja, a Halejeŭ i Vital Puchnarevič chavalisia za miažoj. Puchnarevič dahetul znachodzicca ŭ mižnarodnym vyšuku.
U 2005 hodzie Halejeŭ byŭ abjaŭleny ŭ mižnarodny vyšuk. Adnak heta nie pieraškodziła jamu pierabracca ŭ Rasiju i navat atrymać hramadzianstva hetaj krainy. Adnak chutka pravaachoŭnyja orhany Samarskaj vobłaści aryštavali Halejeva za niezakonna atrymany pašpart hramadzianina RF. Advakaty złodzieja ŭ zakonie dabilisia razhladu spravy svajho klijenta Jeŭrapiejskim sudom pa pravach čałavieka. U 2010 hodzie JESPČ pryniaŭ rašeńnie, što złodzieja ŭ zakonie aryštavali niezakonna. Rasija adpuściła Halejeva, i jon pajechaŭ u Šviecyju.
Dźmitryj Halejeŭ byŭ departavany sa Šviecyi za parušeńnie mihracyjnaha zakanadaŭstva 26 sakavika hetaha hoda. U toj ža dzień kryminalny aŭtarytet byŭ aryštavany ŭ Nacyjanalnym aeraporcie Minsk.
Kamientary