BATE — bieź piaci chvilin čempijon, ale Jermakovič viedaje, jak zakrucić hajki
U subotu, 9 listapada, čarhovy raz čempijon krainy pa futbole (a heta vośmy raz zapar BATE) moža vyznačycca daterminova. Kab u 10-y raz zavajavać załatyja miedali pieršynstva (1999, 2002, 2006—2012), BATE u Žodzinie dastatkova zhulać uničyju z «Tarpieda-BiełAZam».
Matč pačniecca a 17-j hadzinie i budzie pakazany ŭ pramym efiry adrazu pa dvuch kanałach — Biełaruś-2 i Biełaruś-5.
Nahadajem, što 12 kastryčnika Viktar Hančarenka, jaki pryvioŭ BATE da piaci čempijonstva i piać razoŭ vyvodziŭ u hrupavy raŭnd jeŭrakubkaŭ, padpisaŭ kantrakt z krasnadarskaj «Kubańniu» (jana siońnia hulaje ŭ Lizie Jeŭropie), a barysaŭski kłub ŭznačaliŭ Alaksandr Jermakovič.
Na pieršuju pres-kanfierencyju Alaksandr Jermakovič pryjšoŭ u błakitnaj kašuli, pad koler vačej.
Vyhladaje ŭsio jašče niaŭpeŭnienym. Nie adrazu pryvykaješ da takoj cikavaści. Da hetaha Jermakovič paśpiachova znachodziŭsia za nie samaj šyrokaj, ale vielmi nadziejnaj śpinaj Viktara Hančarenki. Ciapier Viktar Michajłavič sprabuje paładzić z francuzam Džabryelem Sise i inšymi zorkami krasnadarskaj «Kubani». Barysaŭskaje haspadarstva ž pakinutaje na Alaksandra Jermakoviča.
Novamu rulavomu 39 hadoŭ. Jon naradziŭsia ŭ Łunincy. Prafiesijnuju karjeru pačynaŭ u słavutaj «Atacy-Aŭry». Bolš viasiołaj kamandy ŭ Biełarusi nie było nikoli. Uznačalvaŭ jaje charyzmatyčny Jakaŭ Šapira, na žal, užo niabožčyk. Kažuć, u Šapiry nie było vialikich futbolnych viedaŭ, ale bolš tonkaha psichołaha ŭ ajčynny futboł nie viedaŭ. Praktyčna nichto z toj «Ataki-Aŭry» nie zhubiŭsia.
Jermakovič, jak i mnohija inšyja adnakłubniki, pierabraŭsia ŭ BATE. Razam z barysaŭcami jon prajšoŭ šlach ad pieršaha čempijonstva ŭ 1999 da pieršaha ŭdziełu ŭ hrupavym etapie Lihi čempijonaŭ u 2008. Jakraz u toj hod Jermakovič i skončyŭ karjeru, pierajšoŭšy na trenierskuju pracu.
U BATE pierajemnaść užo ŭvajšła ŭ kult. Za 17 hadoŭ isnavańnia ŭ kłuba było 4 treniery. Pryčym nivodny nie zaprašaŭsia adniekul zboku. Uznačalvać kamandu daviarali pamočniku papiaredniaha nastaŭnika. Tak było z Kryvušenkam, Hančarenkam, ciapier ź Jermakovičam. Heta adna z detalaŭ, čamu prychilniki nazyvajuć BATE «siamjoj», a praciŭniki — «siektaj».
Jermakovič hulaŭ na pazicyi apornika. Jon byŭ dobrym futbalistam, ale tak ni razu i nie atrymaŭ vykliku ŭ nacyjanalnuju zbornuju.
Pres-sakratar BATE Siarhiej Daškievič apiekavaŭsia nad Jermakovičam. «Kiraŭnictva kłuba prasiła bližejšyja dva miesiacy nie turbavać novaha treniera z prośbami ab intervju».
Kali kazać pra styl pavodzinaŭ Viktara Hančarenki z žurnalistami, to vyciahnuć ź jaho niešta, kali jon nie chacieŭ, nie atrymlivałasia navat abcuhami. Ale dzieści raz na hod nastaŭnika praryvała na ščyryja hutarki. Adnu z takich jon daŭ padčas anłajnu na «Našaj Nivie», dzie raskazaŭ pra baćku — likvidatara Čarnobylskaj katastrofy i šmat usiaho inšaha.
Jermakovič byŭ vielmi skupy na słovy. Hołas u jaho cichi, davodziłasia prysłuchoŭvacca da skazanaha. Karaciej, uražańnie zrabiŭ čałavieka nie žorstkaha. Adsiul i pytańnie, a što rabić z takim charaktaram, kali kłubu patrebny «nahaniaj».
«Paviercie, znojdziem rezierv, jak zakrucić hajki», — adkazaŭ Jermakovič. I tut sapraŭdy pavieryłasia. Abykamu hiendyrektar BATE Anatol Kapski treniravać svajo «dziecišča» nie dazvolić.
Stała viadoma, što prapanova ad Kapskaha była ahučanaja jašče ŭ pačatku hoda. Zadoŭha da pravału BATE ŭ kazachstanskich stepach.
Hałoŭny redaktar «Salidarnaści» Alaksandr Starykievič sprabavaŭ daviedacca, jakaja ž hałoŭnaja prablema barysaŭskaha kłuba na siońniašni momant. «U nas niama asablivych prablemaŭ», — adkazaŭ Jermakovič. Na ciapierašni momant BATE apiaredžvaje salihorski «Šachcior» na vosiem punktaŭ u čempijanacie krainy. I amal nichto nie sumniajecca ŭ čarhovym čempijonstvie barysaŭcaŭ.
Atrymać kankretnych adkazaŭ ab sielekcyi kamandy na budučy siezon było niemahčyma. Jermakovič abychodziŭsia ahulnymi frazami, hetak rabiŭ i Hančarenka. Uvohule ž novy trenier BATE nazvaŭ Hančarenku trenieram, jaki najbolš paŭpłyvaŭ na jaho.
«Pierad debiutnaj hulnioj u Homieli stelefanoŭvalisia z Hančarenkam, railisia. Ale ŭsie rašeńni prymaŭ ja samastojna», — kaža Alaksandr.
«Moj zarobak mianie zadavalniaje, — kaža Jermakovič. — Ci pavialičyŭsia jon? Biezumoŭna».
Takim było pieršaje znajomstva z novym tvaram BATE.
Kamientary