«Naftahaz Ukrainy» z 8 listapada spyniŭ zakupku hazu ŭ «Hazproma», paviedamlajuć ŚMI Ukrainy i Rasii, spasyłajučysia na rasijskaje Centralnaje dyśpietčarskaje ŭpraŭleńnie paliŭna-enierhietyčnaha kompleksu (CDU JEEK).
Pavodle infarmacyi CDU TEK, u kastryčniku ŭkrainskaja dziaržkampanija atrymała 3,2 miljarda kubamietraŭ rasijskaha paliva, abo ŭ siarednim pa 104 miljony kubamietraŭ u sutki.
6-7 listapada zakupki hazu skaracilisia da 9 miljonaŭ kubamietraŭ u sutki, a z 8 listapada spynilisia.
7 listapada vice-premjer Ukrainy Jury Bojka zajaŭlaŭ, što «Naftahaz» źniziŭ zakupki hazu «Hazproma» ŭ čatyry razy. Adnačasova «Naftahaz Ukrainy» raźličyŭsia z rasijskim «Hazpromam» za pastaŭki pryrodnaha hazu ŭ kastryčniku, paviedamiŭ ministr enierhietyki i vuhalnaj pramysłovaści Ukrainy Eduard Stavicki. «Apłacili.
Skažu 20 listapada, kali dakładnyja dadzienyja ŭsio źbiarom, ale apłacili», —adkazaŭ Stavicki na pytańnie pra toje, kolki «Naftahaz» impartavaŭ u kastryčniku i na jakuju sumu.
U kancy kastryčnika kiraŭnik «Hazproma» Alaksiej Miler paviedamiŭ, što ŭkrainski bok nie zapłaciŭ za haz, pastaŭleny ŭ žniŭni, zavinavaciŭšysia rasijskaj kampanii 882 młn dalaraŭ, i prapanavaŭ pierajści na pieradapłatnuju sistemu pastavak hazu na Ukrainu.
U vieraśni prezident Viktar Janukovič zajaviŭ, što Ukraina budzie praciahvać skaračać zakupki rasijskaha hazu, kali nie dasiahnie kampramisu z Rasijaj.
U čaćvier, 7 listapada, pradstaŭnik «Hazproma» Siarhiej Kupryjanaŭ zajaviŭ, što za kastryčnickija pastaŭki «Naftahaz Ukrainy» pavinien «Hazpromu» 1,355 miljardaŭ dalaraŭ, paviedamlaje ŭkrainskaje ahienctva UNIAN.
Adnak, pavodle krynicaŭ UNIAN u «Naftahazie Ukrainy», Ukraina zapłacić «Hazpromu» za kastryčnickija pastaŭki tolki 15 miljonaŭ dalaraŭ, bo heta adpaviadaje abjomach hazu nabytaha ŭ Rasii za hety miesiac.
Kamientary