Kiraŭnik MZS Rasii Siarhiej Łaŭroŭ ličyć niapravilnymi i kontrpraduktyŭnymi sproby supraćpastaŭlać jeŭrazijskuju intehracyju i «Uschodniaje partniorstva». Pra heta jon zajaviŭ žurnalistam pa vynikach praviedzienaha siońnia ŭ Maskvie sumiesnaha pasiadžeńnia kalehij źniešniepalityčnych viedamstvaŭ Biełarusi i Rasii.
«Pierakananyja ŭ tym, što jość usie padstavy spałučać praces jeŭrapiejskaj i jeŭrazijskaj intehracyi, pryčym rabić heta nie na asnovie pryniaćcia adnabakovych padychodaŭ Jeŭraźviaza, a na asnovie vypracoŭki ŭzajemaprymalnych kirunkaŭ supracoŭnictva», — skazaŭ rasijski ministr.
Jon zajaviŭ, što Maskva zaklikaje Jeŭraźviaz nie vykarystoŭvać prajekt «Uschodniaha partniorstva» ŭ ideałahizavanych metach. «Kali havorać ab inicyjatyvie «Uschodniaha partniorstva», praktyčna rehularna zhadvajecca Rasieja jak pieraškoda dla raźvićcia supracoŭnictva pamiž ES i krainami SND», — skazaŭ Siarhiej Łaŭroŭ.
Na dumku kiraŭnika rasijskaha MZS, Jeŭraźviaz akazvaje biespardonny cisk u ramkach «Uschodniaha partniorstva» na krainy SND. «My ni na kaho nie ciśniem, my tolki prosim z ulikam isnujučych abaviazacielstvaŭ zahadzia zrazumieć, jakija buduć nastupstvy, kab potym nichto ni na kaho nie kryŭdziŭsia», — skazaŭ Siarhiej Łaŭroŭ.
Ministr rastłumačyŭ, što pazicyja Maskvy palahaje ŭ tym, što prava padpisvać abo nie padpisvać adpaviednyja dakumienty ź Jeŭraźviazam — suvierenny vybar luboj ź dziaržaŭ-udzielnic «Uschodniaha partniorstva».
«Pakolki ŭ Rasii z bolšaściu dziaržaŭ SND isnujuć damoŭlenaści ŭ ekanamičnaj śfiery, my prosta pa-tavarysku, pa-siabroŭsku papiaredžvajem, što vybar na karyść źmieny, libieralizacyi ekanamičnych suviaziaŭ ź Jeŭraźviazam paciahnie nastupstvy dla našaha ŭzajemnaha handlu, tamu što my chočam abaranić svoj rynak, svaju pramysłovaść, svaju sielskuju haspadarku», — skazaŭ Siarhiej Łaŭroŭ
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami24
Kamientary