Słavuty metał-hurt Gods Tower prezentuje novy samotnik «Roll Out», jaki vydajecca na vinile dy aŭdyjokasecie. Reliz pryznačany na 4 śniežnia, piša tuzin.fm.
Jaho padtrymlivaje kampanija Wargaming, raspracoŭščyk suśvietnaviadomaj kamputarnaj hulni World of Tanks.
Mienavita hetaja hulnia, raspracavanaja miž inšym u Biełarusi, i natchniła hurt na napisańnie novaj kampazycyi. Lider Gods Tower Uładzisłaŭ Navažyłaŭ (aka Lesley Knife) kaža, što z dapamohaj jaje ratavaŭsia peŭny čas ad depresii, jakaja napatkała jaho ŭ toj čas, kali vyrašana było adradzić kamandu.
«Tak vyjšła, što World of Tanks stała krynicaj natchnieńnia dla pieršaj pa-sapraŭdnamu novaj rečy Roll Out!» — zaznačaje muzyka.
Samotnik było vyrašana vydać na vinile dy aŭdyjokasecie. Akrom zahałoŭnaha treku, u reliz budzie ŭklučany numar «Field of the Dead».
Muzyki ŭpeŭnienyja ŭ tym, što novyja tvory stanuć u adzin šerah ź ichnimi daŭnimi bajevikami. U dzień relizu samotnika 4 śniežnia jon budzie vykładzieny taksama ŭ siecivie.
Jakraz z 4 śniežnia startuje tur Gods Tower. Ciaham miesiaca jany daduć solnyja kancerty ŭ Viciebsku, Mahilovie, Homieli, Miensku, Horadni, Vilni, Bieraści, Bransku, Kijevie i Maskvie.
Gods Tower adna ź niešmatlikich biełaruskich rok-kamandaŭ, jakaja zdoleła zdabyć suśvietnuju viadomaść. Užo ŭ siaredzinie 90-ch jany ličylisia zakanadaŭcami mody ŭ postsavieckaj metał-muzycy.
U 2002 kamanda prypyniła svajo isnavańnie, adnak u 2010 viarnułasia na scenu. Gods Tower vykonvaje pieśni vyklučna pa-anhielsku, adnak na svaim kancercie 30 sakavika 2012 hodu ŭ Miensku Łeśli niečakana dla svaich prychilnikaŭ vykanaŭ kampazycyju «People in the Swamp» na biełaruskaj movie.
Na Šry-Łancy ŭ 37 hadoŭ pamior biełaruski kinapradziusar Andrej Matałyha4
Kamientary