U pasiołku Hančanskim viaskoŭcy ŭtvaryli tavarystva dobraachvotnikaŭ i zasadzili bujnapłodnymi žuravinami učastki lasnoha bałota. Adzin z haspadaroŭ, jaki maje ŭčastak u 10 sotak, užo zdaŭ paŭtony jahad.
U hančanskich sialanaŭ niašmat mahčymaściaŭ atrymać pracu i dobry zarobak: haspadarku tut likvidavali, zastalisia tolki lashas, torfapradpryjemstva i škoła. Tamu samyja pradprymalnyja abjadnalisia ŭ kampaniju, jakaja na adpracavanych tarfianych palach vyroščvaje žuraviny.
Hetuju spravu pačaŭ jašče ŭ 1990‑yja hady Alaksiej Nieściarenka, nastaŭnik muzyki. Ciapier jon kaža, što spracavała intuicyja — siońnia žuraviny dajuć mahčymaść zarabić na žyćcio jamu i dziesiatku kalehaŭ pa tavarystvu.
Praŭda, za hetym staić vialikaja praca i vydatki. Pieršaadkryvalnikam daviałosia nabyvać pasadačny materyjał, sadžać žuraviny maleńkimi čarankami i pałoć ich, a potym zmahacca z marozam i śpiakotaj. Ale dapamahła pryroda: małady biarozavik abaraniŭ žuraviny ad sonca i chaładoŭ, a babry zrabili płacinu, jakaja zabiaśpiečyła płantacyi vilhaćciu.
Ciapier bujnapłodnyja žuraviny vyśpiavajuć u naturalnym bałocie. Heta niezvyčajna vialikija, sakavityja čyrvona‑ružovyja jahady. Jany ekałahična čystyja — tut niama ŭhnajeńniaŭ i inšaj chimii, a taksama i svabodnyja ad radyjonuklidaŭ — vierchni słoj hleby na płantacyjach śpiarša źniali, a ŭžo potym vysadžvali žuraviny.
Siońnia pad žuravinnymi płantacyjami zaniaty 4 hiektary lesa, jašče 3 hiektary svabodnyja dla novych siabraŭ tavarystva. Usie viaskoŭcy, jakija chočuć dałučycca, zaprašajucca. Z kožnaj sotki ciapier atrymlivajuć 50 kiłahram žuravinaŭ, a ŭ pierśpiektyvie pavinna być jašče bolej.
Naprykład, adzin z haspadaroŭ Ivan Parchamovič, jaki maje učastak u 10 sotak, užo zdaŭ paŭtony žuravinaŭ. Spažyvieckaja kaapieracyja sioleta płacić 4 tysiačy za kiłahram jahad. Takim čynam, jon zarabiŭ 2 miljony rubloŭ — niadrenny dadatak da siamiejnaha biudžetu. I siezon zboru ŭradžaju jašče nie zavieršany.
Kličaŭščyna viadomy jak kraj lasoŭ i bałotaŭ, i čamu b tut nie vykarystać pryrodnyja, naturalnyja ŭmovy dla vyroščvańnia smačnych i karysnych dla zdaroŭja žuravinaŭ? Płantatary z Hančanskaha ličać, što hety biźnies moža stać pierśpiektyvaj dla ich pasiołka.
— My ŭ stanie stvaryć novyja pracoŭnyja miescy, — upeŭnieny lidar tavarystva Alaksiej Nieściarenka. — Jašče inšyja adpracavanyja tarfianiki možna zasadzić žuravinami. Patrebna tolki praca i ŭpartaść — vynik budzie. Žuravinami možna zarabić i sabie na žyćcio, i na raźvicćcio pasiołka Hančanski.
Ciapier čytajuć
Achviary intehracyi. Rasija biaspłatnymi pucioŭkami i praz Rassupracoŭnictva zavablivaje biełaruskich dziaciej20
Kamientary