Niedachop finansavańnia mierapryjemstvaŭ pa pieraadoleńni nastupstvaŭ avaryi na ČAES składaje pryblizna 4 trłn rubloŭ
Niedachop finansavańnia mierapryjemstvaŭ pa pieraadoleńni nastupstvaŭ katastrofy na ČAES składaje prykładna 4 trłn. rubloŭ, paviedamiŭ načalnik departamienta pa likvidacyi nastupstvaŭ katastrofy na Čarnobylskaj AES Ministerstva pa nadzvyčajnych situacyjach Uładzimir Černikaŭ 7 lutaha na kalehii pavodle vynikaŭ pracy viedamstva ŭ 2013 hodzie.
Zhodna sa słovami Černikava, u 2014 hodzie na realizacyju dziaržaŭnaj prahramy pa pieraadoleńni nastupstvaŭ katastrofy na ČAES na 2011—2015 hady i na pieryjad da 2020 hoda płanujecca nakiravać 3,6 trłn. rubloŭ. Niedachop finansavańnia na realizacyju dziaržprahramy sioleta składaje 1,6 trłn. rubloŭ, a z ulikam niedachopu srodkaŭ letaś — prykładna 4 trłn., adznačyŭ Černikaŭ.
«Nasupierak kancepcyi dziaržaŭnaj prahramy Ministerstva finansaŭ z 2012 hoda vyznačaje pamier srodkaŭ, jakija pieradajucca z respublikanskaha biudžetu na finansavańnie mierapryjemstvaŭ pa pieraadoleńni nastupstvaŭ avaryi na ČAES, i raźmiarkoŭvaje ich pa abłaściach praparcyjanalna kolkaści nasielnictva», — dadaŭ kiraŭnik departamienta.
Pavodle jaho słoŭ, taki padychod moža prymianiacca ŭ śfiery sacyjalnaj abarony nasielnictva, ale nie padychodzić dla realizacyi zaścierahalnych mier na zabrudžanych terytoryjach. «Užo druhi hod pry raźliku ŭdzielnaj vahi kožnaj vobłaści prymianiajecca hety ničym nie abhruntavany padychod. U vyniku srodki raźmiarkoŭvajucca na karyść terytoryj ź mienšym uzroŭniem radyjacyjnaha zabrudžańnia, ale bolšaj kolkaściu nasielnictva», — adznačyŭ Černikaŭ.
Jon ličyć, što płanavańnie abjomaŭ finansavańnia zaścierahalnych mierapryjemstvaŭ nie pavinna ažyćciaŭlacca biez uliku ich pryjarytetu. «I sioleta ŭ vyniku niedastatkovaha finansavańnia ŭ Bresckaj, Hrodzienskaj, Minskaj i Mahiloŭskaj abłaściach robiacca sproby sekanomić na radyjacyjnaj biaśpiecy, pieraraźmierkavaŭšy srodki z hetaha raździeła na kapitalnaje budaŭnictva», — skazaŭ Černikaŭ.
Pavodle źviestak departamienta, u 2013 hodzie na vykanańnie mierapryjemstvaŭ dziaržprahramy było nakiravana 3,35 trłn. rubloŭ, u tym liku ŭ vyhladzie subviencyj abłasnym i Minskamu haradskomu biudžetu pieradadziena 2,88 trłn. rubloŭ.
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA16
Kamientary