Apalahiety revalucyjnych scenaroŭ davodziać: pieramieny zaŭždy robić mienšynia! Tak, ale… Piša ŭ svaim błohu Alaksandar Kłaskoŭski.
Hety postynh jość vodhukam na prapanovu čytača — parazvažać ab pryčynach palityčnaj pasyŭnaści.
Sapraŭdy: davier da ŭłady i rejtynh prezydenta padajuć. Raście tryvoha za zaŭtrašni dzień. Heta nia hołaja revalucyjnaja publicystyka, tendencyi vyrazna vyjaŭlajucca ŭ sacyjalahičnaj arytmetycy. Kali sumavać adkazy ŭ tablicy 2 voś tut, to vyśviatlajecca sensacyjnaja reč: 44,5% — amal što pałova (!) apytanych NISEPD padtrymlivajuć ideju "Sacyjalnaha maršu"!
Ale jość pradčuvańnie, što i hetaja akcyja nia stanie fenamenalnaj pavodle maštabu. Na jaje ŭ toj ci inšaj stupieni mabilizujuć aktyŭ, a voś litaralnyja ŭładalniki pustych (nu, skažam tak, paŭpustych) kastrulaŭ bajusia što na šeście nie łamanuć.
Kaniešnie, tut možna parazvažać i pra tradycyjnuju aściarožnaść — nazaviem heta tak — suajčyńnikaŭ, jakim hienetyčnaja pamiać padkazvaje, što lubaja novaja ŭłada budzie jašče horšaj. Ale najbolej spryčyniŭsia da inertnaści, na maju dumku, "savok", jahonaja mentalnaja spadčyna. Niama palityčnaj kultury, ujaŭleńnia pra nieabchodnaść źmieny kiroŭnych elitaŭ i, adpaviedna, novaj paradyhmy raźvićcia. U skrajnim vypadku źjaŭlajecca kramolnaja dumka pra novaha cara.
Karaciej, na mitynhi rasčaravany "lichtarat" nia rviecca.
"Hety fenomen nazirajecca ŭžo trynaccać hadoŭ", — skazaŭ palitolah Valer Karbalevič, ź jakim my tolki što abmianialisia mierkavańniami. Jon nahadaŭ, što paśla vybaraŭ-2001 byŭ peryjad, kali rejtynh Łukašenki znachodziŭsia ŭ hłybokaj jamie (dvaccać adsotkaŭ ź niečym tam) — ale čerhaŭ achvotnych zapisacca ŭ apazycyju nie nazirałasia.
"Ludzi nia vierać nikomu, — reziumuje Karbalevič. — Apazycyja nia moža prapanavać prajekt, jaki b abudziŭ intares šyrokaj masy". Surazmoŭca źviartaje ŭvahu i na mentalnaść šarahovaha ludu: taja ž sacyjalohija śviedčyć, što, rasčaroŭvajučysia ŭ palitycy Łukašenki, mnohija prahnuć novaj "mocnaj ruki". Usio adno žyvie paternalisckaja psychalohija: kab dziaržava rehulavała rynak, ceny, zabiaśpiečvała roznyja dabroty, vyhody…
"Tak što tut jašče i prablema kaštoŭnasnaj aryjentacyi elektaratu", — kaža palitolah.
Na jahonuju dumku, najchutčej što "nie apazycyja najpierš spryčynicca da źmieny ŭłady, a prosta niešta laśnie ŭ samoj systemie".
Inšaja reč, što heta nie apraŭdvaje sytuacyju, kali apazycyja elementarna nia łović myšej. Kali biaskoncaje ŭnutranaje vyśviatleńnie stasunkaŭ pieraškadžaje aperatyŭna i kreatyŭna reahavać na pravały ŭładnaj palityki. Kładučy ruku na serca, i toje ž skasavańnie lhotaŭ praspali ŭviesnu; i temu AES, i nieprazrystuju pryvatyzacyju (adna "Aperacyja VELCOM" čaho vartaja!), i, miakka kažučy, niedalnabačnaje chapańnie kredytaŭ, jakija chutka vylezuć bokam, — usie hetyja siužety, jakija jość u sensie pijaru prosta padarunkam dla palityčnych praciŭnikaŭ ułady, raskručvajucca imi tak sabie, cieraź pień-kałodu.
Apalahiety revalucyjnych scenaroŭ davodziać: pieramieny zaŭždy robić mienšynia! Tak, ale, pa-pieršaje, jana musić być rašučaj i kreatyŭnaj. Pa-druhoje, jana zdolnaja pieramahčy, kali budzie mieć za śpinoj krytyčnuju masu maŭklivaj padtrymki.
To bok, zvyčajna pracujuć sama mała dva čyńniki: z adnaho boku, rezka padaje davier da nia zdolnaj adužać kryzu ŭłady, ź inšaha boku — jaje śviadomyja praciŭniki sprytna siadłajuć chvalu niezadavolenaści.
U nas pakul što niama kryzy i jašče niama dastatkova mocnaj apazycyi. Zatoje kapitalna pracuje saŭkovy mentalny tormaz. Voś taki raskład, ja dumaju. Kali łaska, vašyja mierkavańni!
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam5
Kamientary