Ruch «Za Svabodu» zaklikaje ŭłady Biełarusi admianić vizy dla hramadzian Jeŭrasajuza i niekatorych inšych krain
Ruch «Za Svabodu» zaklikaŭ ułady Biełarusi admianić vizavy režym dla hramadzian dziaržaŭ — členaŭ Jeŭrasajuza i dziaržaŭ — kandydataŭ na ŭstupleńnie ŭ ES, a taksama Šviejcaryi, Narviehii, Isłandyi, Lichtenštejna, Japonii, Kanady i ZŠA. Pra heta havorycca ŭ zvarocie, raźmieščanym na sajcie arhanizacyi.
«U nacyjanalnych intaresach Biełarusi raźvivać bolš ciesnyja mižčałaviečyja kantakty z raźvitymi krainami śvietu. Pazityŭny vopyt uviadzieńnia biaźvizavaha režymu padčas čempijanatu śvietu pa chakiei pakazvaje, što Biełaruś technična poŭnaściu hatovaja na taki krok. Našaj krainie jość što pakazać i čym pryciahnuć dobrasumlennych naviedvalnikaŭ. Turyzm u Biełaruś moža stać adnoj z klučavych halin dla stvareńnia novych pracoŭnych miescaŭ, ekanamičnaha rostu i pryciahnieńnia inviestycyj», — miarkujuć u ruchu «Za Svabodu».
Uviadzieńnie biaźvizavaha režymu z krainami ES, a taksama nieadkładnaje ŭviadzieńnie ŭ dziejańnie dahavora ab małym pryhraničnym ruchu z Polščaj i Litvoj, zaznačajuć u arhanizacyi, stanuć dadatkovym arhumientam na karyść Biełarusi padčas praviadzieńnia pieramoŭ ab sproščanym vizavym, a nadalej i biaźvizavym režymie z krainami ES.
Pavodle źviestak Dziaržpahrankamiteta na ranicu 21 maja, pravam biaźvizavaha ŭjezdu ŭ Biełaruś, jaki byŭ uviedzieny dla hledačoŭ čempijanatu śvietu pa chakiei, skarystalisia kala 29 tysiač balelščykaŭ prykładna 50 krain. Lidarami siarod ich źjaŭlajucca hramadzianie Łatvii. Z 25 krasavika ŭ Biełaruś ich pryjechała bolš jak 10 tysiač; pavodle źviestak na 19 maja — 7 tysiač. Zatym iduć hramadzianie Litvy — kala 3.500, Polščy — 2.500, Słavakii — kala 2.000, Finlandyi — bolš za 1.700, Čechii — 1.500, Hiermanii — krychu mienš za 1.500. Siarod balelščykaŭ, haściej i ŭdzielnikaŭ ČS-2014, jakija pierasiekli biełaruskuju miažu bieź viz, taksama 275 hramadzian Kanady i 432 — ZŠA.
Kamientary