Rasiejskaja žurnalistka: Nivodzin kanał RF nie paviedamiŭ, što ŭ Daniecku zahinuli rasiejcy
Nivodzin rasiejski telekanał nie paviedamiŭ ab tym, što 31 hramadzianin Rasijskaj Fiederacyi zahinuŭ u bajach u Daniecku 26 maja, choć la morha byli kamiery «Pieršaha kanała» i «Rasii 24».
Pra heta piša fotažurnalist Maryja Turčankova ŭ błohu na sajcie «Echo Moskvy».
Pavodle jaje słoŭ, «la morha sabrałosia kala sotni žurnalistaŭ mižnarodnych ŚMI, siarod ich byli kamiery i «Pieršaha kanała», i «Rasii 24», jakija paśla nie pieradali nivodnaj naviny ab hetaj padziei», a ŭžo da miažy va Ŭśpiency hruzavik z «hruzam 200» supravadžała tolki jana z tryma kalehami.
«Nivodzin z ajčynnych fiederalnych telekanałaŭ, što miesiacami bietanujuć ideju pra hienacyd ruskich na ŭschodzie Ukrainy i zasille fašystaŭ na zachadzie, tak i nie paviedamiŭ ab tym, što 31 hramadzianin Rasii zahinuŭ u Daniecku 26 maja. Nie patłumačyŭ, u čym podźvih, dziela jakoha jany zahinuli, jak jany trapili na hetuju vajnu, chto adkryvaje «kanał praz Rastoŭ», chto razdaje zbroju i chto sustrakaje truny z nalepkami DNR», — piša Turčankova.
«Va ŭkrainskich ŚMI zahinułych nazvali najmitami i terarystami», — dadaje jana, adznačajučy, što infarmacyjnaja vajna z abodvuch bakoŭ «absalutna ścierła miažu realnaści» i razumieńnia, što na samoj spravie adbyvajecca ciapier na ŭschodzie Ukrainy.
Turčankova piša, što supravadzić cieły zahinułych da miažy ich paprasiŭ «čałaviek z atačeńnia Alaksandra Baradaja, premjer-ministra samaabvieščanaj Danieckaj Narodnaj Respubliki».
«My byli ahałomšanyja pačutym. Heta było pieršaje pryznańnie, što ŭ bajach na Danbasie hinuć rasijskija hramadzianie», — pryznajecca jana. Da hetaha byli apaznanyja pa fatahrafijach tolki dva žychary Daniecka Mark Źvieraŭ i Eduard Ciurucikaŭ, adznačaje žurnalistka.
U Turčankovaj skłałasia ŭražańnie, što dla DNRaŭcaŭ była važnaja prysutnaść žurnalistaŭ pry dastaŭcy cieł da miažy.
31 truna, jakija pahruzili ŭ furu, była pramarkiravanyja nalepkami «Danieckaja Narodnaja Respublika». Da kožnaj ź ich prykładałasia daviedka Danieckaha abłasnoha biuro sudova-miedycynskaj ekśpiertyzy ad 29 maja ab tym, što ni ŭ trupie, ni ŭ trunie niama układańniaŭ, pieramiaščeńnie jakich praź miažu Ukrainy zabaroniena.
Supracoŭniki morha chadzili sa śpisam imionaŭ zahinułych, i navat na paru imhnieńniaŭ prademanstravali ich žurnalistam, ale pahladzieć uvažliva abo sfatahrafavać nie dali. Žurnalisty paśpieli ŭbačyć daviedku na Siarhieja Barysaviča Ždanoviča, 1966 hoda naradžeńnia, i Juryja Fiodaraviča Abrosimava, 1982 hoda naradžeńnia.
Pra Ždanoviča ŭ hrupie «Afhanistan. Ništo nie zabyta, nichto nie zabyty» ŭ «Vkontaktie» pišuć, što jon byŭ instruktaram Centra śpiecpryznačeńnia FSB Rasii ŭ adstaŭcy, vieteranam Afhanistana i Čačni, što 19 maja pryjechaŭ u Rastoŭ-na-Donie na vučeńni i 26 maja byŭ zabity ŭ Daniecku.
Turčankova adznačaje, što ŭ morhu nie chapiła miesca, tamu aktyvisty DNR za dzień da adpraŭki pryhnali dva hruzaviki-refryžeratary dla pieravozki praduktaŭ, kudy pahruzili častku zahinułych. Cieły zachoŭvali ŭ chaładzilnikach fabryki marožanaha. Na bartach i dachu hruzavika z hetym hruzam aktyvisty namalavali farbaj čyrvonyja kryžy i ličby «200».
Pamiežniki byli naściarožanyja, ale, pahladzieŭšy daviedki i zrazumieŭšy, jaki hruz viazuć, prapuścili furu.
-
Pieramovy Rasii i ZŠA ŭ Er-Ryjadzie zaviaršylisia, pra vyniki paviedamiać zaŭtra
-
Rasija na pieramovach u Saudaŭskaj Aravii patrabuje ŭsiu terytoryju čatyroch ukrainskich abłaściej
-
Daradca Trampa pa nacbiaśpiecy vypadkova dadaŭ žurnalista ŭ sakretny čat u Signal. Raskrytyja miechanizmy pryniaćcia rašeńniaŭ
Kamientary