Ci Budzie Nam Fest?

Dva apytańni «Svabody» za dva apošnija tydni paćvierdzili dumku pra toje, što ŭ Biełarusi prahladajucca siońnia dva subjekty palityki, ad jakich niečaha čakajecca, dźvie intryhi — Łukašenka i lider BNF. Pieršy tamu, što jon adzin vyznačaje ŭsio, što robicca ŭ krainie. Druhi tamu, što nieŭzabavie adbudziecca źjezd BNF, i abodva namieśniki staršyni Frontu aktyŭna reklamujuć siabie jak pretendentaŭ na lidera BNF, tady jak sam staršynia maŭčyć. Takaja taktyka, biezumoŭna, pryciahvaje ŭvahu da arhanizacyi, navat kali b jana zusim ničoha nia značyła ŭ žyćci krainy. Miž inšym, heta śviedčyć i pra toje, što ničoha bolš značnaha ŭ biełaruskim unutrypalityčnym žyćci nie adbyvajecca.

Ad Łukašenki čakajuć pakajańnia, vyzvaleńnia palitviaźniaŭ i biełarusizacyi. Ad BNF… Volnaja ci mižvolnaja pieradźjezdaŭskaja pijar‑kampanija viarnuła hetaj arhanizacyi vobraz fłahmana apazycyi. Kali b na takim samym uzdymie jašče j źjezd adbyŭsia i pačałosia paślaźjezdaŭskaje žyćcio, možna było b skazać, što BNF ažyŭ, što jon znoŭ pačynaje, z nadziejaj vyjhrać.

Pieradźjezdaŭskaja pijar‑kampanija viarnuła hetaj arhanizacyi vobraz fłahmana apazycyi.

Praŭda, papiaredniaje dziesiacihodździe nia nadta abnadziejvaje ŭ hetym sensie. Ale zaŭsiody chočacca vieryć, što spektakal jašče nia skončyŭsia i što ŭ novym sezonie my ŭbačym zusim inšy teatar, varty anšlahaŭ i deficytu biletaŭ.

Dyk čaho ž čakajuć ad BNF — jaho lidera i źjezdu?

Niechta raić Viačorku abjadnacca z Paźniakom, niechta — zaprasić na staršyniu Milinkieviča, niechta — pamianiać nazvu.

Što da nazvy, dyk, mabyć, mianiać jaje varta było paśla taho, jak Front raskałoŭsia na BNF i KCHP BNF. Ale tady hetaha nie zrabili dy tak i prachadzili ŭvieś čas u «paźniakistach» pad škvalnym ahniom jahonaj (Paźniaka) krytyki. Tak pad starym imiem partyja dakantavałasia da našych dzion, kali nazva BNF pačała pieratvaracca ŭ bolš‑mienš nejtralny brend (vyrasła novaje pakaleńnie, jakoje nia pamiataje Paźniaka), što moža być napoŭnieny novym źmiestam.

Treba ŭličvać i toje, što źmiena nazvy dla BNF aznačała b sychod u padpolle i stratu siadziby na Mašerava, 8. A heta, u svaju čarhu, stałasia b kancom partyi, u jakoj siońnia, aproč lehalnaha statusu dy słaŭnaj historyi, nijakich inšych aktyvaŭ niama.

Za Viačorkam Front stabilizavaŭsia ŭ niapeŭnaści.

Što da Paźniaka, dyk niedaaformlenyja adnosiny ź im uvieś hety čas ciažkim bałastam lažać na plačach BNF, nie dazvalajučy ź lohkaściu manieŭravać u anklavach biełaruskaj apazycyjnaj palityki. Jak niedavieršany razvod zaminaje sužencam šukać sabie inšych spadarožnikaŭ, a kali tyja j pamykajucca, dyk usio adno ŭ pieršaj ža kvatery im nahadajuć: «A‑a‑a, vy z BNF? Ad Paźniaka, značyć». Ničoha nie źmianiajučy, frontaŭcy byccam vyrašyli dačakacca, kali ŭrešcie adydzie toj elektarat, jaki źviazvaje BNF i Paźniaka, i tady pačniecca volnaje žyćcio.

Za Viačorkam Front stabilizavaŭsia ŭ niapeŭnaści. Vierahodna, taki stan dapamahaŭ arhanizacyi vyžyć, ale adnačasova nie davaŭ raźvivacca, adbiraŭ prychilnikaŭ. Front «adsiadzieŭsia». Voś čamu jašče hety źjezd pryciahvaje da siabie pavialičanuju ŭvahu. Bo vychad ź niapeŭnaści zaŭsiody ryzykoŭny — albo pan, albo prapaŭ. Ź inšaha boku, kali praciahvać «adsiedžvacca» — značyć, možna bolš užo nie raźličvać na takija ŭsploski hramadzkaj uvahi (pieradusim, pazytyŭnaj), jak ciapier.

Zaprasić na liderstva Milinkieviča? Ale ŭ Milinkieviča jość svoj «front», svoj ruch, u jakim frontaŭcam ci ich lideram vyznačalnaha miesca nia budzie. I tut festu nie pradbačycca.

Vy skažacie, što jaho nie pradbačycca ŭ kožnym vypadku? Mahčyma. Ale momant hetaj nieviadomaści i hetaha čakańnia — taksama čahości varty. I demakratyčnaja Biełaruś musić padziakavać BNF za hetyja niekalki miesiacaŭ pryvidnaj nadziei na pieramieny.

Symon Muzyka, SVABODA Biełaruskaja hazeta

• 0
• 0
• 0
• 0
• 0
• 0
• 0
• 0