Suprać prymusu
Jurysty ź Biełaruskaha Chelsynskaha kamitetu źviarnulisia ŭ Kanstytucyjny sud, kab vyśvietlić, nakolki norma pra abaviazkovaje raźmierkavańnie adpaviadaje Kanstytucyi. U BCHK upeŭnienyja, što siońniašniaja forma raźmierkavańnia ŭ Biełarusi maje vyrazny prymusovy charaktar. Miž inšaha, naša kraina padpisała Kanvencyju mižnarodnaj arhanizacyi pracy «Pra skasavańnie prymusovaj pracy». Sioleta suprać studentaŭ, jakija nie źjavilisia pa raźmierkavańni, zaviali 65 kryminalnych spravaŭ. Sumy kampensacyj nie małyja — $3—5 tysiačaŭ.
13 listapada
Klimavu viarnuli ježu
Palitviaźniu Andreju Klimavu viarnuli charčy, jakija ŭ jaho adabrali jašče na pačatku kastryčnika, jak tolki pryvieźli ŭ Mazyrskuju kaloniju. Pra heta paviedamiŭ vykonvajučy abaviazki načalnika Departamentu vykanańnia pakarańniaŭ Jury Barankoŭ: «Charčy brali dla pravierki, ciapier usio viarnuli».
Miž tym svajaki palitviaźnia śćviardžajuć, što ŭžo bolej za try tydni ad Klimava niama adkazaŭ ni na listy, ni na telehramy, tamu jany niepakojacca.
«Tovariŝ» viarnuli praz paŭtara miesiaca
Načalnik haradzkoha adździełu milicyi №1 Leninskaha RUUS Miensku Ŭładzisłaŭ Sčasnovič i jahonyja padnačalenyja viarnuli redaktaru niedziaržaŭnaj hramadzka‑palityčnaj hazety «Tovariŝ» Siarhieju Vaźniaku nakład numaru vydańnia, jaki byŭ skanfiskavany z ofisu redakcyi 27 vieraśnia nibyta dla pravierki na adpaviednaść zakanadaŭstvu. U zaklučeńni pavodle vynikaŭ pravierki, padpisanym 27 kastryčnika, paviedamlajecca, što parušeńniaŭ zakonu nia vyjaŭlena.
BT zdymaje kalinoŭcaŭ
Zdymačnaja hrupa ŭ składzie aperatara Vasila Łasiankova i žurnalistki Aleny Bardzikoŭskaj naviedałasia ŭ Mahiloŭski dziaržuniversytet. U kabinecie dekana jany ŭziali karotkaje interviju ŭ studenta I kursu histfaku Ivana Śpiryna. Apošniamu nastojliva paraili adkazać na pytańni žurnalistaŭ prysutnyja ŭ pakoi pradstaŭniki specsłužbaŭ. Usie pytańni tyčylisia navučańnia I. Śpiryna ŭ Polščy pa prahramie Kalinoŭskaha. Chłopiec advučyŭsia ŭ Toruńskim universytecie 2 semestry i musiŭ viarnucca ŭ Biełaruś pa siamiejnych abstavinach.
14 listapada
Levym nia dajuć abjadnacca
Kalehija Viarchoŭnaha sudu (sudździa — Babkoŭ) admoviła ŭ skarzie na rašeńnie Miniustu ad 9 žniŭnia pra admovu ŭ rehistracyi Sajuzu levych partyjaŭ. Sudździa pryniaŭ bok Minjustu, pakolki adzin z zasnavalnikaŭ SŁP, žanočaja partyja «Nadzieja», była likvidavanaja rašeńniem Viarchoŭnaha sudu 11 kastryčnika.
Rašeńnie Viarchoŭnaha sudu abskardžańniu nie padlahaje.
KDB suprać «Štazi»
U mienskim klubie «Fartuna» musiła adbycca prezentacyja novaha albomu hurta «Nejra Dziubiel» «Štazi». Pavodle słovaŭ lidera «ND» Alaksandra Kulinkoviča, kancert zabaraniŭ adździeł idealohii Partyzanskaha rajonu. Pryčynaŭ admieny kancertu nie patłumačyli, prosta zahadali źbirać rečy. Niadaŭna ŭ «Fartunie» prezentavali svaje novyja albomy hurty «Krama» i «N.R.M.», čyje žyvyja vystupy ŭ Biełarusi stali redkaj źjavaj paśla kancertu ŭ parku Družby narodaŭ ŭ 2004 h. na dazvolenaj uładami akcyi apazycyi.
16 listapada
Školniki ŭ pastarunku
U Mazyry na mitynhu suprać admieny lhotaŭ zatrymali 25 čałaviek, bolšaść ź jakich navučency haradzkich škołaŭ. U pastarunku školnikaŭ sfatahrafali i ŭziali ŭ ich adbitki palcaŭ. Byli składzienyja pratakoły za ŭdzieł u niesankcyjanavanaj vuličnaj akcyi. U parušeńnie dziejnaha zakanadaŭstva, da niepaŭnaletnich nia vyklikali baćkoŭ. Pravaabaroncu Siarhieja Łapušku nie puścili da zatrymanych. Milicejskaje kiraŭnictva patrabavała ad padletkaŭ nazvać arhanizataraŭ akcyi. Pry hetym, pavodle śviedkaŭ, u vypadku admovy padpałkoŭnik milicyi Hvoźdź pahražaŭ školnikam vializnymi štrafami.
16
U Miensku prajšli akcyi salidarnaści z palitviaźniami. Niekalki dziasiatkaŭ siabraŭ hramadzianskaj kampanii «Za svabodu» sabralisia kala ŭniversamu «Pieršamajski» ŭ mienskim mikrarajonie «Ŭručča». Chłopcy i dziaŭčaty trymali partrety źnikłych palitykaŭ i palitźniavolenych. Śviečki salidarnaści zapalili taksama na Kamaroŭcy, pobač z Hałoŭpaštamtam dy carkvoj Śviatoha Jazepa. Kala čyhunačnaha vakzału, Červieńskaha rynku dy na vulicy Maskoŭskaj źjavilisia raściažki. U Varšavie paśla zakančeńnia akcyi salidarnaści pradstaŭnik pasolstva Biełarusi ŭ Polščy paraźbivaŭ zapalenyja pobač z pasolstvam źnički.
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary