Pra heta havorycca ŭ zvarocie biskupa Pinskaha Antonija Dziamjanki da viernikaŭ dyjacezii:
«Darahija braty i siostry ŭ Chryście! Pavažanyja dyjacezijanie i ludzi dobraj voli!
U miesiacy žniŭni chaču asablivym čynam źviarnuć vašu ŭvahu na spravy ćviarozaści.
Dla mnohich z nas hety miesiac — intensiŭny čas i pracy, i adpačynku. Žnivień — heta pieryjad zboru pładoŭ ziamli, ruplivy čas pracy ŭ poli, aharodzie, zboru daroŭ lesu. Letniaja para spryjaje aktyŭnamu adpačynku na rečkach, vadajomach i aziorach, jakimi bahataja naša kraina. Heta taksama čas intensiŭnych vandrovak, naviedvańnia raznastajnych miaścin i ludziej.
Šmatlikija mahčymaści, jakija adkryvaje pierad nami letni čas, z adnaho boku źjaŭlajucca dobrym šancam, kab jašče lepiej paznać i svaju krainu, i inšyja miaściny, i roznych asobaŭ.
Z druhoha boku, šyrokija mahčymaści staviać pierad nami pytańnie ab adkaznaści za zdaroŭje i žyćcio, jakija pa pryčynie nierazvažlivaści ci kiepskich zvyčak možna lohka pastavić pad ryzyku duchoŭnaj, maralnaj ci fizičnaj škody.
Tamu ŭ Pinskaj dyjacezii zaachvočvaju ŭsich ludziej dobraj voli da abstynencyi – paŭstrymańnia ad užyvańnia ałkaholnych napojaŭ asabliva na praciahu miesiaca žniŭnia.
Na žal, prablemy z praźmiernym užyvańniem ałkaholu isnujuć u śviecie daŭno. Viadoma, što ałkahol - heta adna z hałoŭnych pryčyn razvodaŭ. Z-za jaho raźbivajucca suženstvy, siemji, siabroŭstvy, źniščajucca finansavyja źbieražeńni, prynosicca niepapraŭnaja škoda zdaroŭju piečani i mozhu. Ałkahol nie vyrašaje nijakich ciažkaściaŭ i kłopataŭ, ale tolki ich pavialičvaje. Złoŭžyvańnie ałkaholem pryvodzić da ŭźniknieńnia zaležnaści - adnoj ź vielmi składanych prablem sučasnaha čałaviectva.
Kaścioł Pinskaj dyjacezii imkniecca nie być abyjakavym da hetaj balučaj spravy, zaklikaje viernikaŭ i ŭsich ludziej dobraj voli da paŭstrymańnia.
Z historyi Kaścioła my viedajem, što abstynencki ruch maje hłybokija karani ŭ dušpastyrskaj praktycy. U raznastajnych staradaŭnich kaściolnych knihach u parafijach možna znajści zapisy pra asob, jakija prymali na siabie abaviazak paŭstrymańnia ad ałkaholnych napojaŭ abo na peŭny čas, abo nazaŭsiody. U sučasnych umovach isnujuć šmatlikija pilihrymki, maršy, rekalekcyi, malitoŭnyja hrupy i cełyja kaściolnyja ruchi ŭ intencyi ćviarozaha ładu žyćcia…»
Abstynencyja nie źjaŭlajecca sumnym abmiežavańniem, ale šancam i krynicaj vyzvaleńnia, unutranaj siły i radaści. Heta duchoŭnaja sprava i sprava lubovi. Mnostva ludziej hublaje vieru praz złoŭžyvańnie ałkaholem, tamu abstynencyja ŭ žniŭni maje asablivaje značeńnie, bo moža stać achviaraj, jakaja paspryjaje viartańniu da Boha. Abstynencyja moža taksama prymacca i z patryjatyčnych, i hramadskich, i siamiejnych matyvacyj, tym samym stanoviačysia vyrazam achviarnaj lubovi da bližniaha i śviedčańniem kłopatu pra inšych. Kožny chryścijanin maje misiju być śviedkam viery, a taksama ćviarozaści, tamu što viera pavinna być zdarovaj i ćviarozaj.
Zaachvočvaju z nadziejaj raspačać žnivień jak miesiac paŭstrymańnia ad ałkaholu. Prašu pryniać hety šlachietny abaviazak dabravolnaj abstynencyi. Niachaj jon budzie śviedčańniem, što vy nie źjaŭlajeciesia zakładnikami škodnych zvyčak. Pakažycie, što vy mudryja, svabodnyja, adkaznyja i advažnyja.
Asabliva źviartajusia z zaklikam paŭstrymacca ad ałkaholu maci, jakija nosiać pad sercam novaje žyćcio. Ad pieršych chvilin źjaŭleńnia dziciaci žančyna stanovicca vartaŭnikom jaho zdaroŭja. U pieršyja dzieviać miesiacaŭ adzinym miescam žyćcia dziciaci źjaŭlajecca maci. Padčas ciažarnaści navat nievialikaja kolkaść spažytaha ałkaholu moža vielmi surjozna naškodzić dziciaci, atručvajučy jaho arhanizm. Fizičnyja i psichičnyja nastupstvy mohuć być nastolki ciažkimi, što biezzvarotna pakalečać usio žyćcio. Tamu asabliva ŭ błahasłaŭlony pieryjad čakańnia naradžeńnia novaha dziciaci važna, kab maci viała ćviarozy ład žyćcia, i najlepš, kab jana była abstynentkaj.
Kožny čałaviek, ale asabliva duchoŭnyja asoby i miedyki, maje abaviazak pieraścierahać žančyn ab nastupstvach užyvańnia ałkaholu ŭ pieryjad ciažarnaści. A baćki, blizkaja radnia i siabry majuć śviaty abaviazak padtrymać žančynu ŭ pieryjad ciažarnaści ŭ zachavańni poŭnaj abstynencyi ad ałkaholu. Najlepšaj ža padtrymkaj dla jaje budzie ćviarozaje akružeńnie. Tamu zaachvočvaju ŭsich praz paŭstrymańnie zaśviedčyć inšym, što my zdolnyja i hatovyja być adkaznymi za žyćcio i zdaroŭje nie tolki svajo, ale i inšych asobaŭ, asabliva biezabaronnych i nienarodžanych.
Zaachvočvaju vas, darahija braty i siostry, pryniać hetyja pastanovy ŭ imia viery i lubovi, u imia adkaznaści za našyja siemji, za Kaścioł, za hramadstva, u jakim žyviom. Spadziajusia na vašuju mudraść i razvažlivaść».
***
Pinskaja dyjacezija abjadnoŭvaje kaścioły Bresckaj i Homielskaj abłaściej
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary