Supraćstajańnie pamiž Rasijaj i ZŠA pryviało da skasavańnia pahadnieńnia ab supracoŭnictvie ŭ jadziernaj śfiery pamiž krainami.
Jak piša The New York Times, heta supracoŭnictva pamiž navukoŭcami ličyłasia adnym z samych pierśpiektyŭnych.
Pahadnieńnie było padpisana tolki 11 miesiacaŭ tamu pamiž ministrami enierhietyki ZŠA Ernestam Monicam i Rasii Siarhiejem Kiryjenkam. Čakałasia, što takoje supracoŭnictva dapamoža pieraadoleć usie niehatyŭnyja nastupstvy chałodnaj vajny.
U pryvatnaści, heta pahadnieńnie adkryvała rasijskim navukoŭcam dostup da serca amierykanskaha jadziernaha kompleksu - łabaratoryi ŭ Łos-Ałamasie, štat Ńju-Mieksika, dzie ŭ svoj čas była stvorana pieršaja jadziernaja bomba.
Zatoje amierykanskija navukoŭcy atrymali b dostup da anałahičnych ustanoŭ u Rasii.
Taksama ŭ ramkach takoha supracoŭnictva praduhledžvaŭsia pošuk rašeńniaŭ, jakija mahli b abaranić Ziamlu ad asteroidaŭ.
Zrešty, pakul usie mierapryjemstvy i sustrečy ŭ ramkach hetaha pahadnieńnia admienienyja amierykanskim Minenierhietyki. Pradstaŭniki hetaha viedamstva adkryta zajavili, što pryčynaj stała anieksija Rasijaj Kryma.
Vydańnie ŭdakładniaje, što takoje rašeńnie pryviadzie da taho, što baki nie buduć viedać ab namierach adzin adnaho ŭ jadziernaj śfiery.
Zrešty namieśnik ministra enierhietyki ZŠA Devid Ponieman adznačyŭ, što ZŠA praciahnuć supracoŭnictva z Rasijaj u śfiery biaśpieki jadziernych materyjałaŭ.
Kamientary