Nabyŭ zakonnuju moc abvinavaŭčy pryhavor suda Maładziečanskaha rajona ŭ dačynieńni da Dźmitryja Novika, jaki z 2 pa 4 vieraśnia 2013 hoda pa pošcie razasłaŭ u 11 škoł rajonnaha centra listy z patrabavańniem pieravieści 10 tysiač dołaraŭ na elektronny rachunak.
U inšym vypadku złačynca abiacaŭ uzarvać bomby ŭ škołach, dzie znachodzilisia dzieci, paviedamiŭ staršy pamočnik prakurora Minskaj vobłaści Łarysa Parchimovič.
Jana nahadała, što, žadajučy skryć dadzienyja, jakija dazvalajuć jaho identyfikavać, žychar Maładziečanskaha rajona niesankcyjanavana vykarystaŭ biespravadny punkt dostupu da internetu (WI-FI) i ad imia byłoha muža svajoj dziaŭčyny zarehistravaŭ elektronnuju skryniu i elektronny kašalok. U listach z paviedamleńniem ab niebiaśpiecy ŭkazaŭ numar elektronnaha kašalka.
Na paviedamleńnie ab niebiaśpiecy vybuchaŭ adreahavali milicyja, ratavalniki, śpiecyjalnaje padraździaleńnie pa baraćbie z teraryzmam, piratechničnaja hrupa. Sa škoł evakujavali vučniaŭ i nastaŭnikaŭ. Vybuchovyja pryłady znojdzienyja nie byli.
Novik pryznany vinavatym u zaviedama niepraŭdzivym paviedamleńni ab padrychtoŭcy vybuchu, što paciahnuła pryčynieńnie ŭronu ŭ bujnym pamiery i inšyja ciažkija nastupstvy (č. 2 art. 340 KK), i ŭ niesankcyjanavanym dostupie da kampjutarnaj infarmacyi, učynienym ź inšaj asabistaj zacikaŭlenaści (č. 2 art. 349 KK). Jon pryhavorany da čatyroch hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach uzmocnienaha režymu.
Pastanovaj sudovaj kalehii pa kryminalnych spravach Minskaha abłasnoha suda na padstavie zakona ab amnistyi Novik častkova vyzvaleny ad pakarańnia terminam na adzin hod.
Za paniesienyja straty ŭ suviazi z praviadzieńniem rabot pa likvidacyi nadzvyčajnaj situacyi, praviadzieńni mierapryjemstvŭ pa vyjaŭleńni i praduchileńni takich aktaŭ, evakuacyi ludziej na karyść dziaržaŭnych ustanoŭ z abvinavačanaha spahnana bolš za 30 miljonaŭ rubloŭ, a taksama dziaržpošlina ŭ dachod dziaržavy.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady31
Kamientary