Набыў законную моц абвінаваўчы прыгавор суда Маладзечанскага раёна ў дачыненні да Дзмітрыя Новіка, які з 2 па 4 верасня 2013 года па пошце разаслаў у 11 школ раённага цэнтра лісты з патрабаваннем перавесці 10 тысяч долараў на электронны рахунак.
У іншым выпадку злачынца абяцаў узарваць бомбы ў школах, дзе знаходзіліся дзеці, паведаміў старшы памочнік пракурора Мінскай вобласці Ларыса Пархімовіч.
Яна нагадала, што, жадаючы скрыць дадзеныя, якія дазваляюць яго ідэнтыфікаваць, жыхар Маладзечанскага раёна несанкцыянавана выкарыстаў бесправадны пункт доступу да інтэрнэту (WI-FI) і ад імя былога мужа сваёй дзяўчыны зарэгістраваў электронную скрыню і электронны кашалёк. У лістах з паведамленнем аб небяспецы ўказаў нумар электроннага кашалька.
На паведамленне аб небяспецы выбухаў адрэагавалі міліцыя, ратавальнікі, спецыяльнае падраздзяленне па барацьбе з тэрарызмам, піратэхнічная група. Са школ эвакуявалі вучняў і настаўнікаў. Выбуховыя прылады знойдзеныя не былі.
Новік прызнаны вінаватым у заведама непраўдзівым паведамленні аб падрыхтоўцы выбуху, што пацягнула прычыненне ўрону ў буйным памеры і іншыя цяжкія наступствы (ч. 2 арт. 340 КК), і ў несанкцыянаваным доступе да камп'ютарнай інфармацыі, учыненым з іншай асабістай зацікаўленасці (ч. 2 арт. 349 КК). Ён прыгавораны да чатырох гадоў пазбаўлення волі з адбываннем пакарання ў папраўчай калоніі ва ўмовах узмоцненага рэжыму.
Пастановай судовай калегіі па крымінальных справах Мінскага абласнога суда на падставе закона аб амністыі Новік часткова вызвалены ад пакарання тэрмінам на адзін год.
За панесеныя страты ў сувязі з правядзеннем работ па ліквідацыі надзвычайнай сітуацыі, правядзенні мерапрыемствў па выяўленні і прадухіленні такіх актаў, эвакуацыі людзей на карысць дзяржаўных устаноў з абвінавачанага спагнана больш за 30 мільёнаў рублёў, а таксама дзяржпошліна ў даход дзяржавы.
Каментары