U Biełarusi ŭ siarednim rak małočnaj załozy ŭ III—IV stadyi vyjaŭlajecca ŭ 23% vypadkaŭ, paviedamiła zahadčyk adździeła ankamamałohii z ankahiniekałahičnaj hrupaj Respublikanskaha navukova-praktyčnaha centra ankałohii i miedycynskaj radyjałohii imia M.M.Alaksandrava Jaŭhienija Šapavał na pres-kanfierencyi ŭ Minsku 19 žniŭnia.
«Heta vysoki pracent. Zachvorvańnie pry takoj stadyi vyznačajecca pry vizualnaj łakalizacyi. Naprykład, u ZŠA rak małočnaj załozy vyjaŭlajecca na pieršaj stadyi ŭ 95% vypadkaŭ», — skazała Šapavał.
Pavodle jaje słoŭ, zachvorvańnie na rak małočnaj załozy pavialičvajecca. U 2013 hodzie ŭpieršyniu heta zachvorvańnie było vyjaŭlena ŭ čatyroch tysiač biełaruskich žančyn.
Šapavał adznačyła, što čym raniej vyjaŭlajecca rak, tym bolšaja vierahodnaść paśpiachovaha lačeńnia. Tak, vyžyvalnaść na praciahu piaci hadoŭ pry zachvorvańni na rak małočnaj załozy I stupieni składaje 90%, a pry IV — da 10%. U suviazi z hetym urač zaklikała žančyn adkazna stavicca da svajho zdaroŭja i va ŭzroście bolš za 50 hadoŭ prachodzić mamahrafičnaje abśledavańnie bieź śpiecyfičnych pakazańniaŭ.
Śpiecyjalist adznačyła pośpiechi strachavoj miedycyny ŭ farmiravańni prychilnaści da zdarovaha ładu žyćcia i prachodžańnia prafiłaktyčnych abśledavańniaŭ. U vypadku kali čałaviek nie vykonvaje pryznačeńni ŭrača, u tym liku nie abśledujecca, strachoŭka nie dziejničaje, za lačeńnie płacić sam chvory. U vyniku ŭ raźvitych krainach «vielmi vysoki pracent achopu mamahrafičnym skryninham — 80-90% žančyn adpaviednaj uzrostavaj hrupy».
U Minsku prachodzić piłotny prajekt pa skryninhu zachvorvańnia na rak małočnaj załozy, u vyniku jakoha budzie vyznačana, jak časta i ŭ jakim uzroście lepš prachodzić mamahrafiju žycharkam Biełarusi. Šapavał adznačyła, što jość ahulnaja rekamiendacyja Mižnarodnaj asacyjacyi pa daśledavańni zachvorvańnia na rak rabić mamahrafiju žančynam va ŭzroście 50—69 hadoŭ raz u dva hady, ale ŭ roznych krainach svoj padychod. Tak, u Francyi rekamiendujecca rabić mamahrafiju adzin raz u 18 miesiacaŭ, u krainach Prybałtyki — raz u try hady.
Ciapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Kamientary