Čałaviek listapada

Chto varty zvańnia asoby apošniaha vosieńskaha miesiaca? Čyje spravy byli najvažniejšymi, chto najbolš zasłužyŭsia dla biełaruskaj supolnaści? Zaprašajem čytačoŭ da hałasavańnia.

Vydaŭcy «Karłsana». Hrupa entuzijastaŭ vydała pa-biełarusku adzin z samych viadomych tvoraŭ švedzkaj piśmieńnicy Astryd Lindhren «Mały i Karłsan-z-dachu». Pierakłaŭ kazku Juraś Žalezka, redaktaram knihi vystupiŭ Lavon Barščeŭski. Prajektam apiekavalisia Nastaśsia Maciaš i Aleś Jaŭdacha. Vydaŭcy sprabujuć zapoŭnić pustku ź biełaruskamoŭnaj dziciačaj litaraturaj, jakaja ŭtvaryłasia praz łukašenkaŭskaje kiravańnie. Ciapier da druku rychtujecca jašče adna kazka Lindhren pra «Pipi Doŭhujupančochu».

Kullinkovič i rok-muzyki. Listapad dla muzykaŭ pačaŭsia zabaronaj klubnaj prezentacyi novaha albomu «Nejra Dziubela» «Štazi». Lider hurtu Alaksandar Kullinkovič prakamentavaŭ hetuju sytuacyju prosta: «Vycierli nohi». Adnak 21 listapada adbyłasia sustreča muzykaŭ Lavona Volskaha, Alaksandra Kullinkoviča, Pita Paŭłava, Ihara Varaškieviča i Aleha Chamienki z hałoŭnym ideolaham krainy Aleham Pralaskoŭskim. Čynoŭnik paabiacaŭ rokieram źniać ź ich zabaronu, kali muzyki admoviacca vystupać na mitynhach apazycyi. Pachod muzykaŭ u Administracyju prezydenta vyklikaŭ nieadnaznačnuju reakcyju siarod udzielnikaŭ internet-forumaŭ i błohaŭ: adny chvalać ich za siurpryz, za nieardynarnuju sprobu źniać zabaronu ź biełaruskaj kultury, druhija haniać za kanfarmizm.

Alaksandar Hleb. Zbornaja Biełarusi pa futbole praviała nadzvyčaj udała listapadaŭski adrezak. Spačatku ŭ Tyranie našy chłopcy pierajhrali albancaŭ (4:2), paśla čaho ŭ Miensku pieramožanymi akazalisia mocnyja halandcy. Heta dazvoliła zbornaj padniacca ŭ rejtynhu FIFA na amal rekordnaje 60-aje miesca. Z prychodam Bernda Štanhie na trenerski mościk, Hleb zahulaŭ za zbornuju z zusim inšym impetam. Plus da ŭsiaho jon staŭ kapitanam kamandy. Naprykancy miesiaca paŭabaronca londanskaha “Arsenału” byŭ piaty raz pryznany najlepšym futbalistam Biełarusi .

Kaciaryna Sałaŭjova. 19-hadovaj połackaj dziaŭčynie pahražajuć adrazu tryma kryminalnymi spravami – za ŭdzieł u niezarehistravanaj arhanizacyi, abrazu čyrvona-zialonaha ściaha i naniasieńnie palityčnych hrafici. Tolki za apošni miesiac u Połacku nieviadomyja dvojčy vyviešvali nad harvykankam bieł-čyrvona-bieły ściah. KDB užo niekali razoŭ pravodziŭ dopyty dziaŭčyny, taksama adbyŭsia pieratrus u internacie, dzie Kaciaryna žyvie. Naprykancy miesiaca kiraŭnictva Połackaha dziaržaŭnaha ŭniversytetu na pasiedžańni admysłovaj dyscyplinarnaj kamisii pryniało rašeńnie ab niemetazhodnaści dalejšaha navučańnia Kaciaryny Sałaŭjovaj.

Alaksandar Radźkoŭ. Ministar adukacyi byŭ adzinahałosna abrany staršyniom respublikanskaha hramadzkaha abjadnańnia “Biełaja Ruś”. Mnohija ličać, što mienavita na bazie “Biełaj Rusi” moža być stvoranaja biełaruskaja partyja ŭłady. U adnym ź pieršych interviju paśla abrańnia Radźkoŭ zajaviŭ: «My majem namier supracoŭničać z usimi zacikaŭlenymi asobami, u tym liku i z apazycyjnymi. Nam cikavaja hetaja dyskusija, sutyknieńnie mierkavańniaŭ. My hatovyja da razmovy i dyjalohu z usimi i z kožnym».

J-mors. Papularny muzyčny hurt vypuściŭ pieršy biełaruskamoŭny albom “Adlehłaść”. Na dysk uvajšło 11 piesień, siarod jakich — try pieśni z papiarednich albomaŭ, dva pierakłady kampazycyj z rasiejskaj movy i šeść novych zapisaŭ. Lider hurtu Ŭładzimier Puhač tak matyvavaŭ vydańnie biełaruskamoŭnaha dysku: «Dakazać sabie i inšym, što biełaruskamoŭnaja muzyka taksama moža być papularnaj i pavinna hučać na radyjo».

Uładzimier Savič. Kiravać Sajuzam mastakoŭ u nastupnyja try hady budzie prafesar i niezaležnaja asoba. Uładzimier Savič na apošnim źjeździe Sajuzu pieramoh svajho kankurenta skulptara Alaksandra Dranca ŭsiaho na dva hałasy.

Natalla Iljinič. Puchavicki rajonny sud asudziŭ nastaŭnicu ź vioski Talka da 1,5 hadoŭ papraŭčych pracaŭ. Jaje abvinavacili ŭ padbuchtorvańni da padrobki medycynskaj daviedki. Daviedka była pryznačanaja dla dački spn. Natalli, Darji, jakaja sioleta viasnoj jeździła ŭ Polšču, kab paŭdzielničać u histaryčnym seminary. Darju sprabavaŭ zaverbavać supracoŭnik KDB, pałochajučy, što daść chadu spravie z daviedkami. Dziaŭčyna admoviłasia ad supracoŭnictva. Natalla Iljinič uvieś čas rašuča była na baku dački, i navat sud jaje nie złamaŭ.

Hary Kasparaŭ. Demakratyja ŭ Rasiei pieražyvaje ciažkija časy. Prastora svabody skurčyłasia, asnoŭnyja pravy čałavieka abmiežavanyja navat macniej, čym u Biełarusi. Šavinistyčny psychoz krapčeje ź miesiaca ŭ miesiac. U Maskvie prajšoŭ čarhovy «Marš Niazhodnych». Na akcyju vyjšła kala čatyroch tysiač śmiełych ludziej. AMON užyŭ siłu suprać demanstrantaŭ, było šmat zatrymanych. Da piaci sutak aryštu byŭ asudžany eks-čempijon śvietu pa šachmatach Hary Kasparaŭ, jakija sprabuje zhurtavać roznyja palityčnyja siły, intelektuałaŭ i hramadzianskuju supolnaść na abaronu svabody i pluralizmu. Dziejnaść ludziej kštałtu Kasparava pakidaje Rasiei nadzieju na eŭrapiejskuju budučyniu.

Prosim hałasavać u akiency dla apytańniaŭ.

Vykarystańnie internet-prahramaŭ dla nakrutki kolkaści hałasoŭ za adnu z opcyj — heta niepavaha da inšych ludziej. Redakcyja adsočvaje hetyja nakrutki i nia ŭličvaje ich pry padviadzieńni vynikaŭ. Tak heta zdarałasia ŭžo 4 razy.

• 0
• 0
• 0
• 0
• 0
• 0
• 0
• 0