Z 17 vieraśnia pražytačny minimum u Biełarusi raźličvajecca pa-novamu

Urad Biełarusi zaćvierdziŭ pražytačny minimum dla asnoŭnych sacyjalna-demahrafičnych hrup nasielnictva i Pałažeńnie ab paradku raźliku biudžetu pražytačnaha minimumu pa asnoŭnych sacyjalna-demahrafičnych hrupach i ŭ siarednim na dušu nasielnictva.

Takoje rašeńnie źmieščana ŭ pastanovie Savieta Ministraŭ ad 4 vieraśnia 2014 hoda numar 865, jakaja ŭstupaje ŭ siłu z 17 vieraśnia, paviedamili ŭ pres-słužbie biełaruskaha ŭrada.

Jak adznačyła načalnik upraŭleńnia kompleksnaha analizu Ministerstva pracy i sacyjalnaj abarony Taćciana Juškievič, pastanova numar 865 raspracavana ŭ adpaviednaści z artykułam 5 zakona «Ab uniasieńni źmianieńniaŭ i dapaŭnieńnia ŭ niekatoryja zakony Respubliki Biełaruś pa pytańniach vyznačeńnia pražytačnaha minimumu».

Ciapier pražytačny minimum składajecca ź minimalnych naboraŭ praduktaŭ charčavańnia dla asnoŭnych sacyjalna-demahrafičnych hrup nasielnictva; niecharčovych tavaraŭ i pasłuh, košt jakich vyznačany jak fiksavanaja dola ŭ pamiery 77 pracentaŭ ad koštu minimalnaha naboru praduktaŭ charčavańnia.

«Nabory praduktaŭ charčavańnia sfarmiravany na asnovie norm fizijałahičnych patrebnaściej u charčovych rečyvach i enierhii dla roznych hrup darosłaha i dziciačaha nasielnictva. Praduktovyja nabory adpaviadajuć patrabavańniam racyjanalnaha charčavańnia i zachoŭvajuć nieabchodnuju enierhietyčnuju kaštoŭnaść i chimičny sastaŭ, — rastłumačyła pradstaŭnik ministerstva. — Fiksavanaja dola vyznačana na padstavie aficyjnaj statystyčnaj infarmacyi Biełstata ab faktyčnych spažyvieckich raschodach małazabiaśpiečanych damašnich haspadarak za apošnija piać hadoŭ (z 2009 pa 2013 hod uklučna), a taksama za pieršy kvartał biahučaha hoda».

Pavodle jaje słoŭ, dla vyznačeńnia fiksavanaj doli niecharčovych tavaraŭ i pasłuh uličvalisia takija spažyvieckija artykuły raschodaŭ małazabiaśpiečanych damašnich haspadarak, jak raschody na adzieńnie, abutak, tkaninu; meblu, pradmiety bytavoha pryznačeńnia; asabistyja pasłuhi, pradmiety asabistaha karystańnia; žyllova-kamunalnyja pasłuhi; achovu zdaroŭja; pasłuhi adukacyi; pasłuhi hramadskaha transpartu; suviaź.

Pałažeńniem vyznačany paradak raźliku biudžetu pražytačnaha minimumu (BPM), zamacoŭvajecca pieryjad dziejańnia BPM pry jaho štokvartalnym zaćviardžeńni Ministerstvam pracy i sacyjalnaj abarony (da hetaha času BPM zaćviardžaŭsia rašeńniem urada).

Ministerstvam pracy i sacyjalnaj abarony BPM pa asnoŭnych sacyjalna-demahrafičnych hrupach i ŭ siarednim na dušu nasielnictva budzie zaćviardžacca (jak i raniej uradam) u cenach apošniaha miesiaca kožnaha kvartała. Tak, BPM na pieryjad z 1 lutaha pa 30 krasavika - u cenach śniežnia; z 1 maja pa 31 lipienia — u cenach sakavika; z 1 žniŭnia pa 31 kastryčnika — u cenach červienia; z 1 listapada pa 31 studzienia — u cenach vieraśnia.

BPM raźličvajecca dla šaści asnoŭnych sacyjalna-demahrafičnych hrup nasielnictva — pracazdolnaje nasielnictva; piensijaniery; studenty; dzieci va ŭzroście da 3 hadoŭ; ad 3 da 6 hadoŭ; ad 6 da 18 hadoŭ.

U jakaści biudžetu pražytačnaha minimumu ŭ siarednim na dušu nasielnictva prymajecca siaredniedušavy biudžet pražytačnaha minimumu siamji z čatyroch čałaviek.

Košt praduktaŭ charčavańnia, što ŭklučajecca ŭ BPM u siarednim na dušu nasielnictva, vyznačajecca jak košt minimalnaha naboru praduktaŭ charčavańnia dla siamji z čatyroch čałaviek (mužčyny pracazdolnaha ŭzrostu, žančyny pracazdolnaha ŭzrostu, chłopčyka va ŭzroście 13 hadoŭ i dziaŭčynki va ŭzroście 7 hadoŭ).

Paradak raźliku raschodaŭ na ŭznosy i płaciažy nie źmianiŭsia dla BPM u siarednim na dušu nasielnictva i dla BPM pracazdolnaha nasielnictva.

• 0
• 0
• 0
• 0
• 0
• 0
• 0
• 0