U Breście padpisana pahadnieńnie ab uzajemadziejańni ŭ baraćbie sa złačynnaściu pamiž Biełaruśsiu i Rasijaj
15 vieraśnia ŭ Breście padčas pasiadžeńnia Abjadnanaj kalehii ministerstvaŭ unutranych spraŭ Sajuznaj dziaržavy padpisana pahadnieńnie pamiž Biełaruśsiu i Rasijaj ab pavyšeńni efiektyŭnaści ŭzajemadziejańnia ŭ baraćbie sa złačynnaściu.
Ab hetym paviedamlajecca na sajcie biełaruskaha MUS.
Dakumient padpisali ministr unutranych spraŭ Biełarusi Ihar Šunievič i ministr unutranych spraŭ Rasii Uładzimir Kałakolcaŭ.
Kiraŭnik MUS Biełarusi adznačyŭ, što z padpisańniem hetaha dakumienta značna pašyrajecca pravavaja baza dla supracoŭnictva, papiaredžańnia, vyjaŭleńnia, spynieńnia i raskryćcia złačynstvaŭ. «U adpaviednaści z pahadnieńniem my zmožam spraścić praceduru nakiravańnia zapytaŭ ab akazańni takoha sadziejańnia. Užo ŭ najbližejšy čas my majem namier vypracavać paradak, pa jakim terytaryjalnyja padraździaleńni našych ministerstvaŭ buduć uzajemadziejničać naŭprost», — adznačyŭ Šunievič. Jon vykazaŭ upeŭnienaść u tym, što zaklučeńnie miždziaržaŭnaha pahadnieńnia pryviadzie da pavyšeńnia ŭzroŭniu hramadskaj biaśpieki ŭ Biełarusi i Rasii, budzie sadziejničać vynikovaści baraćby z transhraničnaj złačynnaściu.
U svaju čarhu kiraŭnik MUS Rasii adznačyŭ, što ŭ dvuch ministerstvaŭ sabrany vialiki vopyt sumiesnaj pracy na ŭsich uzroŭniach — ad padraździaleńniaŭ centralnych aparataŭ da rajonnych adździełaŭ, sumiesnymi namahańniami raskryvajucca ciažkija i asabliva ciažkija złačynstvy. «Tolki padčas praviadzieńnia troch etapaŭ miždziaržaŭnaj apieratyŭna-prafiłaktyčnaj apieracyi «Vyšuk» na terytoryi Rasii zatrymana 128 hramadzian, jakija adšukvalisia pa inicyjatyvie MUS Biełarusi. U tym liku 24 ź ich — na terytoryi pryhraničnych abłaściej našaj krainy. Biełaruskija kalehi ŭstanavili 61 čałavieka, inicyjataram vyšuku pa jakich vystupała MUS Rasii», — paviedamiŭ Kałakolcaŭ.
Rasijski ministr adznačyŭ, što ź intehracyjaj troch krain u Jeŭrazijski ekanamičny sajuz 1 studzienia 2015 hoda ŭvodzicca svabodnaje pieramiaščeńnie tavaraŭ, pasłuh, kapitałaŭ i rabočaj siły. «Heta mahutny impuls dla dalejšaha ŭmacavańnia našych uzajemaadnosinaŭ. Razam z tym u pravaachoŭnaj śfiery źjaŭlajucca dadatkovyja zadačy. My abaviazany ŭžo ciapier abjadnoŭvać našy namahańni pa procidziejańni novym vyklikam i pahrozam», — padkreśliŭ Uładzimir Kałakolcaŭ.
Ciapier čytajuć
«Ludzi chočuć pieramovaŭ z tymi, chto maryć ich źniščyć fizična». Hutarka z Alaksandram Kabanavym pra žyćcio, «Biełpoł» i razychodžańnie ź Piatruchinym5
Kamientary