Pieršy ŭ Mahilovie «Dranik-fest» projdzie 18 kastryčnika, paviedamili ŭ Mahiloŭskim dziaržaŭnym univiersitecie charčavańnia.
U etnahrafičnym kompleksie «Zialony haj» ceły dzień haściej mierapryjemstva buduć častavać adnoj z samych viadomych i lubimych straŭ biełaruskaj kuchni — dranikami. U konkursnaj prahramie na pryhatavańnie samaha smačnaha i aryhinalnaha dranika buduć udzielničać kamandy profilnych VNU i kaledžaŭ Mahiloŭskaj vobłaści, jakija zajmajucca padrychtoŭkaj śpiecyjalistaŭ u śfiery hramadskaha charčavańnia.
Prafiesijnaje žury ŭ składzie śpiecyjalistaŭ univiersiteta charčavańnia i restarataraŭ budzie aceńvać aryhinalnaść stravy, spałučalnaść praduktaŭ, stupień składanaści i majsterstva, estetyčnaść, mastacki hust i tvorčaść. A haściam kulinarnaha śviata budzie pradastaŭlena mahčymaść samim vyznačyć padčas dehustacyi, kamu ž dastaniecca pryz hastranamičnych hladackich pieravah.
Padčas «Dranik-festa» haściej taksama čakaje šmat muzyki, nacyjanalnych biełaruskich piesień, tancaŭ i, viadoma ž, mahčymaść paznajomicca ź biełaruskimi kulinarnymi tradycyjami. Na fiestyvali možna budzie ŭbačyć pracu kucharaŭ-prafiesijanałaŭ, daviedacca pra kłasičnyja i niezvyčajnyja recepty pryhatavańnia lubimaj stravy.
Arhanizatarami śviata vystupajuć Centr haradskich inicyjatyŭ i Mahiloŭski dziaržaŭny univiersitet charčavańnia pry padtrymcy administracyi Kastryčnickaha rajona Mahilova, studenckaha etnahrafičnaha tavarystva, hramadska-kulturnaj kampanii «Budźma biełarusami».
Kamientary