Biełaruś biare kredyty ŭ Rasiei, Aŭstryi, Kitai
Pry kancy hodu Biełaruś biare kredyty na paŭmiljarda dalaraŭ. Heta ŭdvaja pavialičyć zamiežnuju zapazyčanaść krainy.
19 śniežnia ministry finansaŭ Biełarusi j Rasiei Mikałaj Korbut i Alaksiej Kudryn padpisali mižuradavaje pahadnieńnie ab vydzialeńni Biełarusi rasiejskaha kredytu na 146 młn dalaraŭ «dla zabieśpiačeńnia zbalansavanaści raźlikaŭ va ŭzajemnym handli». Pahašeńnie kredytu j vypłata pracentaŭ buduć adbyvacca sa žniŭnia 2007 h. da listapada 2011 h. Hod tamu Biełaruś užo atrymała adzin rasiejski dziaržkredyt — 175 młn dalaraŭ — dla kampensacyi pavyšeńnia koštu pastavak rasiejskaha hazu. Ale cana na haz nie ŭzrasła, i kredytnyja srodki byli nakiravanyja na pakryćcio biudžetnaha deficytu-2004.
Da 20 śniežnia Mikałaj Korbut planuje padpisać u Vienie jašče adno kredytnaje pahadnieńnie — pra pryciahnieńnie supolnaha (syndykavanaha) kredytu niekalkich bankaŭ na sumu 34 młn dalaraŭ. Heta budzie pieršy kredyt takoha typu, pryciahnuty ŭradam. Arhanizatary kredytu — rasiejski «Zamiežhandalbank», aŭstryjski «Rajfajzen Centralbank» i jahony biełaruski partner «Pryjorbank».
Vialiki abjom kredytnych srodkaŭ u najbližejšy čas pastupić z Kitaju: 184,2 młn dalaraŭ ad Ekspartna-impartnaha banku i 50 młn uradavaha kredytu. Srodki pojduć na apłatu abstalavańnia j razhortvańnie sietki aperatara mabilnaj suviazi «Biest».
Pryciahvańnie kredytaŭ pavialičyć zamiežny doŭh Biełarusi, jaki skaračaŭsia apošnim časam (ciapier — 600 młn dalaraŭ). Da kanca hodu jon uzraście da 1 młrd dalaraŭ. Razam ź inšymi zapazykami — zamiežnyja daŭhi biełaruskich bankaŭ, pa «inšych sektarach, kredyty zamiežnych firmaŭ (pramyja investycyi) — ahulnaja ličba ŭražvaje: amal 5 młrd dalaraŭ.
Prafesar Stanisłaŭ Bahdankievič nia bačyć u hetym vialikaje niebiaśpieki: «Uvieś śviet žyvie na pazykach. Ale z atrymańniem kredytaŭ treba pavyšać technalahičny składnik u vytvorčaści, kab nie puścić kredyty ŭ pavietra. U nas tolki 4% ekanomiki składajuć vysokija technalohii, u pramysłovaści 30% pradpryjemstvaŭ stratnyja, jašče bolš za 35% pracujuć z uzroŭniem rentabelnaści ad 0 da 5%», — kaža S.Bahdankievič.
Kamientary