Indyja vystaŭlaje pretenzii Maskvie pa prahramie źniščalnika 5-ha pakaleńnia
Deli nie moža biaskonca čakać ad Rasii padpisańnia kantrakta na poŭnamaštabnuju raspracoŭku i vytvorčaść źniščalnika 5-ha pakaleńnia FGFA.
Pra heta paviedamlaje The Times of India sa spasyłkaj na krynicu ŭ ministerstvie abarony Indyi.
FGFA musić być indyjskaj viersijaj rasijskaha źniščalnika 5-ha pakaleńnia PAK FA, finansavańnie jakoj pravodzicca roŭnymi častkami z dvuch bakoŭ — pa $5,5 miljarda.
Čakałasia, što Indyja kupić 127 źniščalnikaŭ hetaha typu na sumu $25 miljardaŭ, pry hetym pastupleńnie pieršaha pratatypa ŭ Indyju płanavałasia ŭ 2014 hodzie. Ale Rasija nie dała Indyi poŭnaha dostupu da techničnaj dakumientacyi mašyny, taksama nie paviedamlałasia pra pieradaču pratatypa sioleta.
Pieršapačatkovy kantrakt byŭ padpisany ŭ 2010 hodzie, i indusy ŭžo vydatkavali na prajekt amal $300 miljonaŭ.
Padpisańnie kančatkovaha kantrakta ź Indyjaj było zatrymana Rasijaj na 2 hady, da taho ž płanavałasia, što tolki praz 94 miesiacy pavietranyja siły Indyi pačnuć atrymlivać novyja źniščalniki.
«Rasii paviedamili, čto Indyja nie moža čakać FGFA 10 hod. Raskłady pastavak musiać być skaročanyja… Rasijanie, mahčyma, adkažuć padčas vizita Pucina», - skazała krynica Times of India.
Paharšeńnie ekanamičnaj situacyi ŭ Rasii i jaje samaizalacyja ŭ vyniku ahresii suprać Ukrainy zaŭvažna asłabili mižnarodnyja pazicyi Maskvy. Z hetym mohuć być źviazanyja i ahučanyja indyjskija pretenzii, i bolš chutkija, čym płanavałasia, pastaŭki najnoŭšych rasijskich uzbrajeńniaŭ Kitaju ŭ hetym hodzie.
Kamientary