Try inśpiektary pa abłaściach stali hubiernatarami: Lis u Breście, Šarstnioŭ u Viciebsku, Damanieŭski ŭ Mahilovie

Siarod inšych čynoŭnikaŭ, pryznačeńni atrymali i try staršyni abłvykankamaŭ. «Naša Niva» znajomić ź bijahrafijami «hubiernataraŭ».

Anatol Łis zaniaŭ miesca, zdavałasia b, niepataplalnaha Kanstancina Sumara. Toj kiravaŭ vobłaściu bolš za 10 hadoŭ!

Pavialičyć

Lis naradziŭsia ŭ vioscy Raŭki Mastoŭskaha rajona, heta kala samaha Skidziela. Jamu 56 hadoŭ.

Pracoŭnaja knižka Lisa pierapoŭnienaja samymi raznastajnymi zapisami. Pačynaŭ jon hazaelektrazvarščykam na aŭtabazie, paśla byŭ hałoŭnym inžynieram u kałhasie, vykładčykam u PTV, instruktaram rajkama, sakratarom partyjnaj arhanizacyi kałhasa…

Niezaležnaść jon sustrakaŭ u jakaści namieśnika staršyni kałhasa ŭ Hrodzienskim rajonie. U «viertykali ŭłady» Lis apynuŭsia ŭ 1996-m, kali na dziesiacihodździe ŭznačaliŭ Navahrudski rajvykankam. Ad hetaha rajona ŭ 2005-m pajšoŭ u pałatu pradstaŭnikoŭ.

Pa łukašenkaŭskaj zaviadzioncy nieŭzabavie deputata paklikali na dadatkovuju pracu. U 2007-2009 Lis uznačalvaŭ Mazyrski rajvykankam, a paśla staŭ namieśnikam ministra pryrodnych resursaŭ. Narešcie, apošni čas jon byŭ pamočnikam Alaksandra Łukašenki, inśpiektaram pa Homielščynie.

U Lisa dźvie adukacyi – Biełaruski instytut miechanizacyi sielskaj haspadarki (BDATU) i instytut palitałohii i sacyjalnaha kiravańnia KPB.

* * *

Novy kiraŭnik Mahiloŭščyny Uładzimir Damanieŭski taksama pryjšoŭ na pasadu z pracy inśpiektaram. Jahony papiarednik Piatro Rudnik niekalki dzion tamu byŭ pryznačany dyrektaram mahiloŭskaha «Chimvałakna».

Pavialičyć

Damanieŭski naradziŭsia ŭ 1960 hodzie ŭ Dziaržynsku i rabiŭ karjeru na małoj radzimie. Paśla zakančeńnia BDATU (jak i Anatol Lis), jon pracavaŭ dyrektaram stancyi junych technikaŭ, a potym instruktaram arhanizacyjnaha adździeła Dziaržynskaha harkama KPB. Paśla razvału SSSR jaho pasadu transfarmavałasia ŭ zahadčyka adździeła pa spravach moładzi Dziaržynskaha harvykankama (paśla i rajvynkama).

Damanieŭski atrymaŭ druhuju adukacyju ŭ Akademii kiravańnia (1998) i pajšoŭ na pavyšeńnie, u Minabłvykankam. Za vosiem hadoŭ pracy jon daros da namieśnika staršyni kamiteta pa sielskaj haspadarcy i charčavańnia. Niejki čas Damanieŭski inśpiektavaŭ Minščynu ŭ składzie aparatu Saŭmina, a ŭ 2009 staŭ kiraŭnikom Słuckaha rajvykankama.

Z 2013 Damanieŭski byŭ pamočnikam Łukašenki, inśpiektaram pa Hrodzienščynie.

* * *

Ałharytm nie daje zboju – treci novy hubiernatar Mikałaj Šarstnioŭ taksama da hetaha dnia byŭ inśpiektaram. Jon sačyŭ za Viciebščynaj usiaho try miesiacy i zastaŭsia ŭ joj ža kiraŭnikom.

Pavialičyć

Čynoŭniku 53 hady, jon naradziŭsia ŭ Aršanskim rajonie. Pa adukacyi — zaatechnik (skončyŭ Viciebski vieterynarny instytut).

Baćka Šarstniova byŭ miechanizataram, Hierojem sacyjalistyčnaj pracy.

U bijahrafii syna — kiravańnie kałhasam «Znamia pieramohi» Aršanskaha rajona, praca načalnikam upraŭleńnia sielskaj haspadarki Minrajvykankama.

U 2006-m Šarstnioŭ staŭ dyrektaram «Biełptuškaprama», a ŭ 2012 – hiendyrektaram «1-j Minskaj ptuškafabryki».

• 0
• 0
• 0
• 0
• 0
• 0
• 0
• 0