Za dzień da premjery Minkult uvioŭ abmiežavańnie «18+» na film «50 adcieńniaŭ šeraha»
U Biełarusi 11 lutaha Ministerstva kultury ŭviało ŭzrostavaje abmiežavańnie na prahlad eratyčnaha trylera «50 adcieńniaŭ šeraha», premjera jakoha ŭ prakacie pryznačanaja na 12 lutaha. Film zabaraniajecca da prahladu hledačami, maładziejšymi za 18 hadoŭ, paviedamili ŭ adździele repiertuarnaha prahnazavańnia UP «Kinavideaprakat» Minharvykankama.
Svajo ekśpiertnaje zaklučeńnie Respublikanskaja ekśpiertnaja kamisija pa praduchileńni prapahandy parnahrafii, hvałtu i žorstkaści Biełarusi vyniesła mienš čym za sutki da premjery filma. Da hetaha času bolš za 40 tysiač hledačoŭ paśpieli nabyć kvitki ŭ kinateatry.
Uzrostavaje abmiežavańnie «18+» aznačaje, što hledačam, jakija nie dasiahnuli paŭnalećcia, kasiry nie majuć prava pradavać kvitki. Taksama nie dapuskajucca ŭ miesca pakazu filma hledačy, jakija nie dasiahnuli ŭzrostu, praduhledžanaha indeksam kinastužki. U adpaviednaści z praviłami kinaabsłahoŭvańnia nasielnictva, pastaŭščyk pasłuhi abaviazany pakryć hledaču pa jaho patrabavańni košt kvitka ŭ vypadku admovy ŭ dopusku ŭ miesca pakazu filma pa pryčynie «niedasiahnieńnia hledačom uzrostu, praduhledžanaha indeksam filma».
U ZŠA rejtynhavaja asacyjacyja MRAA, što aceńvaje źmiest filmaŭ z punktu hledžańnia ŭzrostavaha abmiežavańnia, prysvoiła filmu samy strohi rejtynh — R. Heta aznačaje, što dzieci da 17 hadoŭ mohuć hladzieć film tolki ŭ prysutnaści darosłych. Film, jaki atrymaŭ rejtynh R, zvyčajna źmiaščaje seksualnyja sceny, epizody z užyvańniem narkotykaŭ, niecenzurnuju łajanku, frahmienty z hvałtam i h.d.
Suśvietnaja premjera filma adbudziecca 11 lutaha ŭ ramkach Mižnarodnaha Bierlinskaha kinafiestyvalu. Pa kolkaści nabytych zahadzia kvitkoŭ film «50 adcieńniaŭ šeraha» pabiŭ rekord pa papularnaści za ŭsiu historyju kinaprakatu ŭ Biełarusi.
Kali Kanapackaja stała całkam padkantrolnaja Łukašenku?22
Kamientary