Janukievič: «Sačkavać» pary kiepska, ale dziela Dnia Voli možna
Staršynia partyi BNF Alaksiej Janukievič, jaki źjaŭlajecca adnym z arhanizataraŭ demanstracyi na Dzień Voli, patłumačyŭ «NN», što ŭ hetym hodzie płanujecca zrabić akcent na moładź, bo mienavita studenty zmohuć masava prysutničać padčas akcyi, jakuju Minharvykankam sioleta dazvoliŭ u 15:00 u sieradu 25 sakavika.
«Budziem zaklikać ludziej prychodzić. Viadoma, heta budzie składana dla tych, chto pracuje. Ale moładź, studenty zvyčajna zakančvajuć vučycca ŭ hety čas, tamu my źviartajemsia da studentaŭ z asablivym zaklikam», — paviedamiŭ Janukievič.
Staršynia BNF nie vyklučaje, što, kab pazbavić studentaŭ mahčymaści ŭdziełu ŭ Dni Voli, administracyi navučalnych ustanoŭ mohuć terminova zładzić niejkija zaniatki ci zadziejničać inšyja mietady. Adnak Janukievič ličyć, što dziela ŭdziełu ŭ akcyi možna prapuścić zaniatki.
«Sačkavać» pary kiepska, ale dziela takoj spravy možna», — skazaŭ Janukievič.
Pry hetym Janukievič spadziajecca, što Dzień Voli ŭ 2015 hodzie źbiare dastatkova ŭdzielnikaŭ:
«U minułym hodzie akcyja na Dzień Voli była samaj masavaj z času prezidenckich vybaraŭ 2010 hodu. Ludzi adreahavali na situacyju ŭ rehijonie i pryjšli, bo adnoj z temaŭ była zajaŭlenaja salidarnaść z Ukrainaj. U hetym hodzie hetyja temy taksama buduć klučavymi, tamu my raźličvajem, što pryjduć ludzi, choć dla niekatorych heta budzie składana. My raźličvajem, što ludziej budzie nie mienš,čym u minułym hodzie».
Arhanizatary demanstracyi płanavali pryznačyć pačatak zboru udzielnikaŭ na 17:00, pravieści demanstracyju z 18:00 da 19:15, a da 20:00 zładzić mitynh. Adnak Minharvykankam pieranios akcyju na 2 hadziny raniej.
«Viadoma, pieranos akcyi na raniejšy čas — śviadomaje rašeńnie. Adnak u Minharvykankamie patłumačyli, što pieranieśli śviatkavańnie Dnia Voli na taki rańni čas, kab mitynh pravodziŭsia padčas śvietłavoha dnia, a nie ŭ ciemry. Taksama nam skazali, što zajaŭleny nami čas supadaje z hadzinaj pik, i, choć ruch nie pierakryvajecca, heta stvaraje niazručnaści dla haradžan. Skazali, u minułym hodzie pastupała šmat skarhaŭ», — raskazaŭ Janukievič.
Ciapier čytajuć
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki11
Kamientary