Arhanizatary Dnia Voli zaklikajuć nie paddavacca na pravakacyi i prychodzić a 15.00
20 sakavika ŭ ciadzibie Partyi BNF prajšła pres-kanfierencyja arhanizataraŭ śviatkavańnia Dnia Voli. Pradstaŭniki apazicyjnych partyj nazvali patrabavańni Minharvykankama pravakcyjnymi, adnak zaklikali ich nie parušać.
Staličnyja ŭłady pryznačyli pačatak šeścia na 15.00. Ale sioleta 25 sakavika traplaje na sieradu, heta pracoŭny dzień, što stvaraje peŭnyja prablemy dla ŭsich achvotnych uziać udzieł u šeści.
«My kvalifikujem dziejańni ŭładaŭ jak palityčnuju pravakacyju, — zajaviŭ lidar AHP Anatol Labiedźka. — Škada, što novapryznačany kiraŭnik Minska Šorac pačynaje svaju dziejnaść takim čynam».
Hetaje mierkavańnie padtrymali i astatnija arhanizatary. Staršynia partyi BNF Alaksiej Janukievič paviedamiŭ, što rašeńnie Minharvykankama mieła na mecie zryŭ mierapryjemstva, i zaklikaŭ ŭsich, chto zmoža, i asabliva moładź, padtrymać śviatkavańnie.
Maryna Chomič, pradstaŭnik arhkamiteta pa stvareńni partyi «Biełaruskaja chryścijanskaja partyja», zaklikała ŭsich udzielnikaŭ prynosić nacyjanalnuju simvoliku, ale paźbiehnuć pravakacyjnych simvałaŭ. Darečy, ukrainskija ściahi na šeści nie zabaronienyja.
«Taksama ja chaču źviarnucca da ŭsich, chto siadzić u sacsietkach i daje adznaku hetamu śviatkavańniu i našym dziejańniam, da tych, chto zaklikaje ludziej źbiracca to a 17, to a 18 hadzinie. My ŭ siońniašnich abstavinach nie chočam padstaŭlać ludziej pad milicejskija dubinki, tamu zaklikajem spynić hetyja pravakacyi, — skazała Chomič.
— Heta apošnim časam sychodzić u pieršuju čarhu ad Art-Siadziby, na žal. Pryčym, my nieadnarazova zaklikakli ich prychodzić na arhkamitet, kab my razam abmiarkoŭvali prahramu śviata, ale, nichto ź ich nie dałučyŭsia».
Juryj Hubarevič, pieršy namieśnik staršyni ruchu «Za Svabodu», vykazaŭ dumku, što ŭłady svaim rašeńniem chočuć padkreślić baraćbu z darmajedstvam, maŭlaŭ, a chto jašče vychodzić u pracoŭny čas na šeści, akramia darmajedaŭ?
Nahadajem, što zbor udzielnikaŭ śviatkavańnia adbudziecca a 15.00 kala kinateatra «Kastryčnik», zatym płanujecca šeście da parku Družby narodaŭ, mitynh z 17.00. Tematyka mierapryjemstva — niezaležnaść, salidarnaść z Ukrainaj, pratest suprać antydemakratyčnaj palityki. Buduć razdavacca nacyjanalnyja stužki, bieł-čyrvona-biełyja ściahi, abiacajuć vystup muzykaŭ.
«My chočam nie tolki vykazać svajo staŭleńnie da peŭnych prablemaŭ, ale i stvaryć sapraŭdnuju atmaśfieru śviata», - padkreśliŭ Hubarevič.
Taksama padčas śviatkavańnia projdzie zbor podpisaŭ za toje, kab 25 sakavika pryznali nacyjanalnym śviatam na aficyjnym uzroŭni.
Kali Kanapackaja stała całkam padkantrolnaja Łukašenku?22
Kamientary