Na ŭłasnyja kibiervočy my pabačym, jak Indyja abhonić ZŠA.
Kali nie adbudziecca hłabalnych vojn ci katastrof, nasielnictva Ziamli ŭ 2050 hodzie dasiahnie 9,6 młrd čałaviek. Užo siońnia viadomyja niekatoryja detali pra ich (i našaje) žyćcio.
Budziem žyć pa 76 hod
Siaredniaja praciahłaść žyćcia ziamlanina maje dasiahnuć 76 hod da 2050 hoda. Mahčyma, da 2100 hoda jana dasiahnie i 82 hod. U 2010 hodzie siaredniaja praciahłaść žyćcia pa śviecie była ŭ rajonie 69 hod, pa Biełarusi składała 71,5 hod (65,6 hod dla mužčyn i 77,4 dla žančyn, 104 miesca pa śviecie).
Budziem vieryć u Chrysta i Ałacha
Da 2050 hoda kolkaść chryścijan vyraście da 2,92 młrd čałaviek, musulman — da 2,76 młrd. U 2070 hodzie kolkaść chryścijan i musulman zraŭniajecca. Ateistaŭ stanie bolš u Jeŭropie i ZŠA, ale pa śviecie ahułam stanie mienš. U Biełarusi dola ateistaŭ praktyčna nie źmienicca.
Nastupnaja «załataja lichamanka» projdzie nie na Ziamli
Płacina, jakuju možna zdabyć z adnoha siaredniaha asteroida, kaštuje jak piać kampanij Apple. Užo siońnia čałaviectva ŭmieje sadžać kaśmičnyja aparaty na asteroidy i ŭžo płanuje vysadzić čałavieka. Možna čakać, što ŭ bližejšyja 10-20 hod budzie raspracavanaja nadziejnaja technałohija zdabyčy karysnych vykapniaŭ z kosmasu.
Indyjskaja ekanomika abhonić amierykanskuju
U 2050-m najbujniejšaj ekanomikaj śvietu zastaniecca Kitaj. Ale pa vałavym unutranym pradukcie ZŠA «spaŭzie» z druhoha na treciaje miesca, pamianiaŭšysia pazicyjami ź Indyjaj. Za ZŠA pa śpisie pojduć Indanezija, Brazilija, Mieksika, Japonija, Rasija, Nihieryja i Hiermanija. Francyja i Brytanija źniknuć z top-10 ekanomik śvietu, a siamiorka krain, jakija raźvivajucca, abhonić siońniašniuju «vialikuju siamiorku».
Nastolnyja kampjutary praktyčna vymruć
Rynak nastolnych kampjutaraŭ užo siońnia pieražyvaje nie lepšyja časy — jon praktyčna nie raście, tym časam jak rynak smartfonaŭ pakazvaje niaspynny rost. Sprava nie tolki ŭ papularnaści: smartfony i płanšety mohuć całkam zamianić šarahovamu karystalniku nastolny kampjutar. Na ich užo iduć hulni 10-hadovaj daŭniny, a razryŭ z PK pa vyličalnych mahutnaściach skaračajecca. Chutčej za ŭsio, nastolny kampjutar u 2050 hodzie stanie vyklučna prafiesijnym instrumientam, dy i budzie vyhladać jak manitor-manabłok. A zvyčajny piersanalny kampjutar źmieścicca ŭ kišeni, na hałavie ci na ruce.
U 3D-drukavanych damach budziem jeści 3D-drukavanuju picu
Siońnia słovazłučeńnie «3D-pryntar» usio jašče hučyć troški ekzatyčna. Ale sama ideja 3D-pryntaraŭ, papłastovaje farmavańnie mašynaj abjektaŭ zadadzienaj formy, užyvajecca usio šyrej. Haječny kluč, pistalet, piečyva, dom ci navat «žyvy vientyl» možna nadrukavać choć zaraz. Da 2050, kali nie da 2030 hoda 3D-pryntary, vierahodna, buduć u kožnym domie — navošta chadzić u kramu pa pradukty, kali ich možna razdrukavać? A lanota drukavać — chaj robaruki zhatujuć.
My, kibarhi
Užo siońnia možna atrymać padłučany naŭprost da mozhu pratez ruki. Kampjutary ŭžo źbirajucca źmienšyć da pamieraŭ 100 mikron — takija možna ŭstalavać u žyvuju kletku. Ale pratezavańnie pojdzie dalej: italjancy abiacajuć da 2027 hoda stvaryć sintetyčnyja vočy. Takimi tempami nie spatrebicca i pierasadka hałavy — cieła možna budzie amal całkam rabatyzavać.
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni1
Kamientary