Ministr infarmacyi: Asobnyja internet-resursy vyklikajuć surjoznyja pytańni, ciapier vyznačajem uładalnikaŭ
Asobnyja internet-resursy vyklikajuć surjoznyja pytańni Ministerstva infarmacyi Biełarusi, zajaviła kiraŭnik viedamstva Lilija Ananič 4 maja na pres-kanfierencyi ŭ Minsku.
Pavodle jaje słoŭ, Mininfarm «aktyŭna analizuje internet-resursy na pradmiet vykanańnia zakanadaŭstva». «Bačym, što siońnia nie ŭsie ŭładalniki internet-resursaŭ pryniali miery, kab ich pradukcyja ŭ poŭnaj miery adpaviadała nacyjanalnamu zakanadaŭstvu», — skazała Ananič.
Ministr padkreśliła, što adpaviednaść zakanadaŭstvu aznačaje raźmiaščeńnie dakładnaj infarmacyi, «infarmacyi, jakaja spryjaje raźvićciu hramadstva i dziaržavy i ni ŭ jakim razie nie nanosić škodu nacyjanalnym intaresam».
Jana nahadała, što novy zakon ab ŚMI praduhledžvaje adkaznaść uładalnikaŭ internet-resursaŭ. Zaraz idzie praca pa vyznačeńni ŭładalnikaŭ internet-resursaŭ, zarehistravanych pa-za zonaj.by. «Usie ŭ nas u nacyjanalnaj infarmacyjnaj prastory roŭnyja pierad zakonam», — padkreśliła Ananič.
«Hetaja praca praciahvajecca. Jašče dastatkovaje pole dziejnaści ŭ hetym kirunku ŭ dziaržavy», — skazała Ananič.
U Biełarusi 1 studzienia 2015 hoda nabyli moc papraŭki ŭ zakon «Ab srodkach masavaj infarmacyi». Adna z hałoŭnych navacyj zaklučajecca ŭ tym, što dziejańnie zakona ab ŚMI, za vyklučeńniem patrabavańniaŭ ab dziaržaŭnaj rehistracyi, raspaŭsiudžvajecca na internet-ŚMI. Heta aznačaje, što internet-resursy ciapier niasuć adkaznaść za publikacyi ŭ sietcy naroŭni z aficyjnymi ŚMI. Pry hetym u zakonie vyznačanyja ŭmovy, pry jakich mahčymaje abmiežavańnie dostupu da internet-ŚMI. Adkaznaść za źmiest kantentu lažyć na ŭładalnikach internet-resursaŭ.
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary