Kampanija «Budźma biełarusami!» zapuściła «Koła śviataŭ» — novy pazityŭny nabor paštovak pra biełaruskija tradycyjnyja śviaty na anhlijskaj i biełaruskaj movach.
Vosiem paštovak pra vosiem śviataŭ! Nabor ilustravany malunkami maładoj mastački Anhieliny Koršunavaj i staŭ uvasableńniem jaje dypłomnaj pracy, dapracavanaj i dapoŭnienaj pry dapamozie kampanii i znanych śpiecyjalistaŭ. Teksty — lohkija i pazityŭnyja, zroblenyja na prośbu arhanizataraŭ piśmieńnicaj Maryjaj Martysievič, raskazvajuć historyju śviataŭ, źviazanyja ź imi tradycyi i dajuć niekalki viasiołych paradaŭ pa śviatkavańni ŭ sučasnych umovach.
Aŭtar malunkaŭ Anhielina Koršunava raskazała, što ideja paštovak uźnikła paśla taho, jak jana pračytała artykuł pra vykarystańnie biełaruskaha arnamientu ŭ sučasnym adzieńni. Da taho ž akurat na toj momant mastačka ŭciahnułasia ŭ postkrosinh, a paštovak ź biełaruskim nacyjanalnym kałarytam brakavała.
«Spačatku ja imknułasia pieradać sutnaść kožnaha śviata praz asobny simvał arnamientu, — tłumačyć Anhielina. — Ale paśla bolš hłybokaha vyvučeńnia temy i asabliva paśla kansultacyi, što mnie arhanizavała kampanija «Budźma!» z doktaram mastactvaznaŭstva Volhaj Łabačeŭskaj, ja pryjšła da vysnovy, što z arnamientu nielha vyryvać asobnyja znaki (heta ž jak vyrvać litary ź vierša, noty ź miełodyi — nijakaha sensu!), bo heta sistema, jakaja charaktaryzujecca zavieršanaściu, rytmam, cełasnaściu. Tamu za asnovu ja ŭziała vobraz, jaki pavinnaja nieści arnamientalnaja kampazicyja».
«Nabor paštovak «Koła śviataŭ» — heta našaja sproba nahladna, z humaram, koratka i zapaminalna danieści infarmacyju, abudzić intares da spadčyny ŭ sučasnaha biełarusa, pryvabić pryhažościu biełaruskaha arnamientu. Dziela hetaha my ŭsie i staralisia», — padsumoŭvaje Anhielina.
Nabor paštovak «Koła śviataŭ» užo možna nabyć u internet-kramach knihi.by, prastora.by i imbryk.by, staličnych kniharniach:
«Akademkniha» (pr-t Niezaležnaści, 72), kniharnia «łohvinaŬ» (pr-t Niezaležnaści, 37A), «Kniharnia piśmieńnika» (vuł. Kazłova, 2), «Viedy» (vuł. K.Marksa, 36), «Śvietač» (pr-t Pieramožcaŭ, 11), «Centralny knižny» (pr-t Niezaležnaści, 19), «Knihi & knižački» (pr-t Niezaležnaści, 14), Knižnaja vystava-kirmaš «Mir knih» (vuł. Janki Kupały, 27), «Eŭryka» (vuł. Kujbyšava, 75).
A nieŭzabavie i ŭ kniharniach pa ŭsioj Biełarusi:
h. Viciebsk («Viedy», vuł. Lenina, 54; «Śvietač», vuł. Kirava, 10), h. Harodnia («Pramietej», vuł. Savieckaja, 10), h. Bieraście («Iskra», vuł. Puškinskaja, 4), h. Lida («Knižny śviet», pr. Pieramohi, 33), h. Maładziečna («Spadčyna», vuł. Prytyckaha, 7), h. Babrujsk («Bukinist», vuł. Uljanaŭskaja, 49), h. Navapołack («Dom knihi», vuł. Maładziožnaja, 145; «Uschod», vuł. Kirava, 4), h. Połack («Śvietač», vuł. Kamunistyčnaja, 21), h. Baranavičy («Knihi», vuł. Savieckaja, 73).
Budźma ź biełaruskimi śviatami!
Hramadskaja kulturnickaja kampanija «Budźma biełarusami!» i aŭtar malunkaŭ vykazvajuć padziaku:
Nastaśsi Ryžankovaj (kiraŭnik dypłomnaha prajekta),
Volzie Łabačeŭskaj (doktar mastactvaznaŭstva),
Taćcianie Vałodzinaj (doktar fiłałahičnych navuk)
za dapamohu ŭ realizacyi prajekta i kansultacyi.
Ciapier čytajuć
Načalnik milicyi Brahina stralaŭ u svaju žonku. Jana cudam vyžyła10
Kamientary