Kompleks «Šanter Chił» u Minsku kala Drazdoŭ płanujuć adkryć u 2027 hodzie. Hety daŭhabud pieradali dla zakančeńnia rabot Upraŭleńniu kapitalnaha budaŭnictva Minharvykankama, piša Realt.by.
17 śniežnia administracyja Centralnaha rajona Minska praviała naradu, pryśviečanuju prablemam niezavieršanaha budaŭnictva. Pavodle ahučanaj infarmacyi, na praciahu dvuch hadoŭ u rajonie płanujuć uvieści ŭ ekspłuatacyju 11 abjektaŭ, ź jakich piać užo zdadzienyja.
Siarod tych, što zastajucca, — šmatfunkcyjanalny kompleks «Šanter Chił» u rajonie praśpiekta Pieramožcaŭ i zavułka Viaśninka. Jaho ŭzvodziać jašče z 2016 hoda. Budynak vyhladaje amal hatovym, ale davodzić prajekt da zaviaršeńnia budzie Upraŭleńnie kapitalnaha budaŭnictva Minharvykankama.
Budaŭnictva kompleksa pobač z vadaschoviščam Drazdy i «Minsk-Arenaj» pačałosia dzieviać hadoŭ tamu. Pieršapačatkova zadumvaŭsia bujny hatelna-dziełavy centr płoščaj kala 140 tysiač kvadratnych mietraŭ. U prajekt uvachodzili 25‑paviarchovy hatel, čatyry ofisnyja vysokija budynki, šmatuzroŭnievy spartyŭny kompleks z krytymi tenisnymi kortami, trenažornaj załaj, basiejnami, SPA-zonaj, restaranam i padziemnaj aŭtastajankaj.
Spačatku prajekt realizoŭvała biełaruskaja kampanija «Interservis», jakaja naležała biznesmienu Alaksandru Šakucinu — uładalniku chołdynhu «Amkador». Hienieralnym padradčykam była kitajskaja kampanija CITIC Construction. Kompleks płanavali adkryć u červieni 2019 hoda i navat zajaŭlali, što raboty mohuć skončyć raniej, ale terminy byli sarvanyja.
U 2018 hodzie źmianiŭsia zakazčyk budaŭnictva — im stała kampanija «Navanep», jakaja taksama naležała Šakucinu. Paźniej źjaviłasia infarmacyja, što ad idei hatela mohuć admovicca i zrabić staŭku pieravažna na ofisnyja pamiaškańni. Inviestycyjnuju damovu padoŭžyli da kanca 2023 hoda, adnak kompleks tak i nie adkryŭsia, choć užo niekalki hadoŭ vyhladaje amal zavieršanym.
Padčas apošniaha pasiadžeńnia administracyi Centralnaha rajona było zajaŭlena, što «Šanter Chił» płanujuć vyklučyć sa śpisu daŭhabudaŭ u 2027 hodzie. Abjekt pieradali ŭ haspadarčaje viadzieńnie KUP «UKB Minharvykankama», jakoje i budzie zajmacca jaho zaviaršeńniem.
Usiaho ŭ Centralnym rajonie na 2025—2027 hady zapłanavana dapracavać 11 prablemnych abjektaŭ. Bolšaść ź ich pavinny zdać užo ŭ 2025 hodzie, piać abjektaŭ uviedzienyja ŭ ekspłuatacyju. Siarod ich — inžynierna-transpartnaja infrastruktura pa prajektavanaj vulicy № 28, mastacka-prykładnyja majsterni Śviata-Jelisaviecinskaha žanočaha manastyra i pieršaja čarha šmatfunkcyjanalnaha hatelnaha kompleksu ŭ rajonie vulic Maksima Bahdanoviča, Janki Kupały i raki Śvisłač.
U 2026 hodzie UKB płanuje zaniacca rekanstrukcyjaj najaŭnaha budynka na Budsłaŭskaj, 29 z uźviadzieńniem prybudovy servisnaha centra.
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary