Fihuranty «Čornaj sotni» nazvali śpis «tryźnieńniem varjataŭ»: My ŭsiaho tolki prapahandujem rasiejskuju kulturu

«Bolšaść biełarusaŭ dumaje i havoryć pa-rasiejsku. My prapahandujem rasiejskuju movu i dbajem pra jakaść jaje vykładańnia», — kiraŭniki arhanizacyjaŭ sa stvoranaha «Maładym Frontam» «čarnasociennaha śpisu» kažuć, što palityčnych pytańniaŭ, a pahatoŭ źviazanych z dałučeńniem Biełarusi da Rasiei, u ichnich statutach niama.

Pavialičyć

«Małady Front» sabraŭ na svaim sajcie źviestki pra «sto ahmianioŭ kramloŭskaj ahresii» ŭ Biełarusi.

«U toj čas, kali va Ŭkrainie paśla «Majdana» rasiejskaja ahresija pierajšła ŭ adkrytuju vajennuju formu, u Biełarusi akupacyja ŭsio jašče praciahvajecca praź dziejnaść bieźličy jak aficyjna zarehistravanych, tak i nielehalnych prarasiejskich arhanizacyjaŭ», — pišuć maładafrontaŭcy.

Kiraŭniki arhanizacyjaŭ z «Čornaha śpisu», ź jakimi pahutaryła Radyjo Svaboda, skazali, što ličać śpis biazhłuździcaj, i vykazali pierakanańnie — takim čynam aktyvisty adpracoŭvajuć zamiežnyja hrošy.

«Maksymum, što robić naša arhanizacyja, — heta ŭmacavańnie spakoju, stabilnaści, miru i siabroŭstva ŭsich narodaŭ, kanfesijaŭ i nacyjanalnaściaŭ, jakija pražyvajuć na terytoryi Biełarusi. Kali my budziem praciahvać u tym ža samym rečyščy, my, vidavočna, paźbiehniem tych niepryjemnaściaŭ, ź jakimi sutyknulisia našy susiedzi», — kaža Ivan Korda, staršynia Biełaruskaha hramadzkaha abjadnańnia «Ruś».

Ivan Korda patłumačyŭ, što arhanizacyja dbaje pra toje, kab «toj miljon etničnych rasiejcaŭ, jakija žyvuć u Biełarusi, hłybiej razumieŭ kulturu Biełarusi, a biełarusy ŭ svaju čarhu — razumieli rasiejskuju nacyjanalnuju kulturu».

«Tym bolš što apošniuju tysiaču hadoŭ biełarusy i rasiejcy byli zaŭsiody razam, a padzieł adbyŭsia litaralna 20 hadoŭ tamu. Ale my nie razhladajem temu pryjadnańnia Biełarusi da Rasiei, tamu što dla hetaha patrebnaja ŭzajemnaja zhoda abodvuch narodaŭ. Nakolki mnie viadoma, ni Rasieja, ni Biełaruś hetuju temu nie padymajuć», — skazaŭ Ivan Korda i dadaŭ, što «Małady Front» jak hramadzkaja arhanizacyja maje prava vykazvać svajo mierkavańnie.

Kiraŭnik Respublikanskaha hramadzkaha abjadnańnia«Russkoje obŝiestvo» Siarhiej Moładaŭ skazaŭ, što prapahanda rasiejskaj movy i kultury — toje, čym zajmajecca jahonaja arhanizacyja, — heta nijakim čynam nie destruktyŭnaja dziejnaść, a «Małady Front» raspaŭsiudziŭ u Internecie tryźnieńnie:

«Hety śpis — tryźnieńnie varjataŭ, kamentavać jaho nia baču sensu. Jość taki rasiejski vyraz «miełoč puzataja» — dyk voś tak by ja nazvaŭ takija arhanizacyi, što stvarajuć takija śpisy».

Siarhiej Moładaŭ patłumačyŭ, što «Russkoje obŝiestvo» zajmajecca padtrymkaj rasiejskaj movy, prapahandaj rasiejskaj kultury i ŭmacavańniem hramadzka-duchoŭnych suviaziaŭ pamiž Biełaruśsiu i Rasiejaj, ale ŭ statucie arhanizacyi niama ničoha pra pahłynańnie adnoj dziaržavy inšaj.

«My ŭśviedamlajem, što ŭ Biełarusi jość prablema niedastatkovaj raspaŭsiudžanaści biełaruskaj movy. Ale sprava ŭ tym, što my rasiejskaje abjadnańnie, i tamu my prapahandujem rasiejskuju movu. Naprykład, my zakłapočanyja tym, što ŭ Biełarusi kiepska arhanizavanaje vykładańnie rasiejskaj movy, što ludzi niapravilna ŭžyvajuć rasiejskuju movu. My zmahajemsia za pavyšeńnie jakaści adukacyi. Ale heta nia značyć, što my zmahajemsia suprać čahości, my nia suprać čahości biełaruskaha. Ale treba ŭličvać, što pieravažnaja bolšaść nasielnictva Biełarusi havoryć i dumaje pa-rasiejsku. Ja nie śćviardžaju, dobra heta ci drenna. Heta fakt. Ja liču, što heta sprava biełaruskich arhanizacyjaŭ — zmahacca za biełaruskuju movu».

I Siarhiej Moładaŭ, i Ivan Korda adznačyli, što kala 90% siabraŭ ichnich arhanizacyjaŭ — heta hramadzianie Biełarusi.

Staršynia Mižnarodnaha dabračynnaha hramadzkaha abjadnańnia «Horad biez narkotykaŭ» Piotar Šapko, jaki biare aktyŭny ŭdzieł u dziejnaści vajskova-patryjatyčnaha klubu «Kazačy Spas», skazaŭ, što «Małady Front» abvinavaciŭ arhanizacyi ŭ «adkrytaj i prychavanaj padrychtoŭcy zachopu Biełarusi Rasiejaj», nie razabraŭšysia ŭ tym, čym mienavita jany zajmajucca:

«Ja hetych ludziej nia viedaju. Jany nas — taksama. Niejkija aktyvisty pišuć pra ludziej, pra jakich jany ničoha nia viedajuć. Heta śviedčyć pra ich słaboje intelektualnaje raźvićcio i pra ich čałaviečyja jakaści».

Padobnym čynam miarkuje Ihar Lakišaŭ, jaki ŭznačalvaje haradzienskaje adździaleńnie rasiejskaj hramadzkaj arhanizacyi «Russkaja obŝina»:

«Im prosta niama čaho rabić, zajmajucca aby-čym. Dzieści im niechta płocić, i jany adpracoŭvajuć hetyja hranty. Hetyja chłopcy prosta marać pra toje, kab tut zapałała. My ŭvohule nia leziem u palityku, ni pra jakija aneksii ci pryjadnańni ničoha nie havaryli nikoli. My stroha prytrymlivajemsia kanstytucyjnaha ładu Respubliki Biełaruś. Naša meta — padtrymka rasiejskaj movy i rasiejskaj litaratury. My za siabroŭstva pamiž narodami i za adzinstva Biełarusi. I nijakich antyŭradavych lozunhaŭ u nas nie było i być nia moža».

Tym časam sustaršynia «Maładoha Frontu»Źmicier Daškievič paviedamiŭ, što ŭžo pačaŭ atrymlivać aburanyja zvaroty ad pradstaŭnikoŭ arhanizacyjaŭ, jakija ŭvajšli ŭ «Čorny śpis»:

«Źviarnuŭsia hamialčuk Valer Bandarenka, jaki kiruje hramadzkim abjadnańniem «Rehijon». Piša, što «Małady Front» — pravakatary. Ja staŭ šukać infarmacyju pra hety «Rehijon» u internecie i pračytaŭ na regnum.ru, što homielski «Rehijon» niadaŭna pryniali ŭ «Russkij intiernacionał». Dyk a chto jany, kali nie čarnasociency? Heta ž kankretnaja «piataja kalona». Tak, jany nie zajaŭlajuć adkryta, što jany za akupacyju, ale jany i tak adčuvajuć sabie ŭ Biełarusi, jak u Rasiei. Kali dzieści źbirajecca dziesiać maładafrontaŭcaŭ, ich tut ža razhaniaje milicyja. A kazaki z aŭtamatami Kałašnikava ładziać šmatludnyja letniki, pravodziać treniroŭki pad rasiejskimi ściahami — i ŭsio dobra. Tak, jany prykryvajucca dbańniem pra rasiejskuju movu (jak byccam by ŭ Biełarusi mała rasiejskaj movy!), rasiejskaj kulturaj i pieramohaj nad fašyzmam. Usio toje samaje, z čaho pačynałasia aneksija Krymu i krovapralićcie ŭ Danbasie».

Nieadnaznačnuju reakcyju vyklikała ŭniasieńnie ŭ «Čorny śpis» mahiloŭskaha pošukavaha klubu «Vikkru». Tak, staršynia Biełaruskaha tavarystva achovy pomnikaŭ historyi i kultury Anton Astapovičkaža, što hetaja arhanizacyja — najbližejšy partner tavarystva i nia maje nijakaha dačynieńnia da nasadžeńnia «russkoho mira» ŭ Biełarusi:

«U śpisie, jaki stvaryŭ «Małady Front», jość surjoznyja kasiaki. Naprykład, tam fihuruje mahiloŭski pošukavy klub «Vikkru», jaki zajmajecca pošukam pareštkaŭ tych, chto zahinuŭ u Druhuju ŭsiaśvietnuju vajnu, a taksama arhanizoŭvaje razam ź dziaržaŭnymi orhanami ich pierapachavańnie i memaryjalizacyju. Heta adna z samych mahutnych niedziaržaŭnych strukturaŭ na terytoryi Mahiloŭskaj vobłaści».

Kiraŭnik Mahiloŭskaha abłasnoha historyka-patryjatyčnaha pošukavaha klubu «Vikkru» Mikałaj Barysienka byŭ niepryjemna ŭražany, kali daviedaŭsia, što jahonaja arhanizacyja trapiła ŭ skandalny śpis. Jon ličyć, heta adbyłosia ad nieabaznanaści aktyvistaŭ «Maładoha frontu» što da dziejnaści klubu. Ciapier Mikałaj Barysienka rychtuje publikacyju statutu «Vikkru» ŭ internecie, kab usie mahli pačytać, jakija mety stavić pierad saboj hetaja arhanizacyja:

«My nie prapaviedujem «russkij mir», ale našy bajcy lažać u Rasiei, a rasiejcy tut pahinuli. Chiba nam treba dalej pa kaściach chadzić? «Małady Front» pra heta nie zadumvajecca. A my pracujem užo 22 hady, za hety čas znajšli i pachavali naležnym čynam bolš za 12 tysiač sałdataŭ. Ja razumieju, što kazackija arhanizacyi ŭ śpisie, dyk my i sami ich krytykujem. Ale nas za što?».

• 0
• 0
• 0
• 0
• 0
• 0