Dźvie školnicy dajšli pieššu ź Minska da Maskvy FOTA
Z saboj ni hrošaj, ni ježy, zatoje «sełfi-pałka».
Vypusknicy minskich škoł, 17-hadovyja Hłoryja i Liza dajšli pieššu ad Minska da Maskvy. Pra ich padarožža raspavioŭ Onliner.by, historyjaj zacikaviŭsia rasijski TJournal.
Bolš za 700 kiłamietraŭ dziaŭčaty prajšli za 23 dni. Baćkam im daviałosia chłusić, što ŭ Maskvu palacieli na samalocie.
Dziaŭčaty vyrašyli vypravicca ŭ padarožža paśla prostaha žartu padčas pasiadziełki ŭ kaviarni. Ź ciaham času jany stali ŭsprymać žart usio bolš surjozna: nabyli namiot, spalniki, partatyŭnyja zaradki dla telefonaŭ i enierhietyčnyja batončyki na vypadak, kali ź ježaj budzie zusim ciažka. Taksama z saboj jany mieli «sełfi-pałku». Hrošaj z saboj dziaŭčaty nie brali — charčavalisia tym, čym pačastujuć dobryja ludzi ŭ vioskach ci na zapraŭkach.
Liza i Hłoryja paśpiachova dajšli da Maskvy, chacia pa darozie daviałosia i pasvarycca, i nachłusić baćkam (navat paprasić znajomaha z Maskvy zrabić skrynšot sa svaimi kaardynatami, kab adasłać baćkam dy pakazać, što jany ŭžo ŭ Maskvie, dy skidać svaje staryja fota adtul). Za dzień, kažuć jany, prachodzili da 60 kiłamietraŭ. Tolki pad Maskoŭskaj kalcavoj ich padabrała siabroŭka. Na Krasnaj płoščy ich užo sustrakali fanaty.
Padčas padarožža dziaŭčaty viali błoh u Instagram i videabłoh na Youtube pad ahulnym zahałoŭkam «Dasiahnuŭšy dupy».
Na Youtube užo apublikavanaje videa pad nazvaj «Trejler filma «Dasiahnuŭšy dupy»».
U Minsk Hłoryja i Liza źbirajucca viartacca ŭžo bolš tradycyjnym transpartam — stamilisia. Pa viartańni jany majuć bahata płanaŭ, ale pakul nie płanujuć nikudy pastupać, chočuć adpačyć ad vučoby. Abiedźvie supracoŭničajuć z madelnymi ahienctvami i spadziajucca padpisać kantrakty ŭ Jeŭropie ci Azii.
Ciapier čytajuć
Kaleśnikava: U 2020‑m ja zmahałasia nie suprać Łukašenki, a za ludziej, svabodu i svabodnyja vybary65
Kamientary