Sojm Partyi BNF 25 lipienia vyznačyŭ pieralik pryncypovych pazicyj, jakija choča bačyć u prahramnych dakumientach aktyvistki kampanii «Havary praŭdu» Taćciany Karatkievič, jakuju padtrymlivaje partyja na prezidenckich vybarach u miežach kaalicyi «Narodny refierendum».
Jak zaznačyŭ staršynia partyi Alaksiej Janukievič, źviazana heta z tym, što Karatkievič užo rabiła «supiarečlivyja vykazvańni».
Partyja BNF miarkuje, što ŭ prahramnych dakumientach Karatkievič niezaležnaść Biełarusi budzie źjaŭlacca «vyšejšaj kaštoŭnaściu». Pry hetym u vypadku svajho abrańnia na vyšejšuju dziaržaŭnuju pasadu jana pavinna «prykłaści ŭsie namahańni dla jaje zachavańnia i ŭmacavańnia».
U metach paźbiahańnia ŭciahvańnia Biełarusi ŭ vajennyja kanflikty Karatkievič prapanoŭvajecca nastojvać na tym, što zamiežnyja vojski i abjekty ŭ maksimalna karotkija terminy buduć vyviedzienyja z terytoryi Biełarusi.
U prahramnych dakumientach Karatkievič, na dumku Partyi BNF, pavinna prysutničać taksama pałažeńnie ab tym, što ŭsie mižnarodnyja damoŭlenaści Biełarusi buduć pierahledžanyja «na pradmiet ich adpaviednaści nacyjanalnym intaresam krainy». Pry hetym Biełaruś vyjdzie z tych, jakija intaresam krainy nie adpaviadajuć.
Karatkievič prapanoŭvajecca stavić metaj praviadzieńnie kanstytucyjnaj reformy, metaj jakoj stanie «viartańnie da demakratyčnych norm kiravańnia i pryncypaŭ viaršenstva prava, źmianšeńnie paŭnamoctvaŭ prezidenta na karyść parłamienta i abmiežavańnie času znachodžańnia na pasadzie dvuma terminami».
Aprača taho, Partyja BNF prapanoŭvaje Karatkievič vykarystać u svaich prahramnych dakumientach nastupnyja pałažeńni: u jakaści dziaržaŭnych simvałaŭ buduć viernuty bieł-čyrvona-bieły ściah i hierb «Pahonia»; budzie zabiaśpiečana pryjarytetnaje raźvićcio biełaruskaj movy i kultury, a ŭ pierśpiektyvie — pierachod na biełaruskuju movu jak adzinuju dziaržaŭnuju; budzie padtrymlivacca instytut tradycyjnaj biełaruskaj siamji jak asnovy biełaruskaha hramadstva; u mižnarodnaj palitycy Biełaruś budzie kiravacca pryncypam cełasnaści i niepadzielnaści dziaržaŭ.
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary