«Najlepšaja ŭ śviecie stancyja budujecca», — zajaviŭ kiraŭnik dziaržavy 27 lipienia padčas dakłada pa pytańniach padrychtoŭki kadraŭ dla jadziernaj enierhietyki i vydzialeńnia dziaržaŭnaha žylla ŭdzielnikam budaŭnictva i ekspłuatacyi Biełaruskaj atamnaj elektrastancyi.
Pavodle jaho słoŭ, AES, jakaja budujecca, — dobry ŭzor atamnaj elektrastancyi. «Rasija choča na prykładzie hetaj stancyi pakazać razam z nami, jakija atamnyja stancyi pavinny być u budučyni», — cytuje Alaksandra Łukašenku jaho pres-słužba.
Łukašenka nahadaŭ, što pieršy enierhabłok stancyi pavinien być zdadzieny ŭ 2018 hodzie, druhi — u 2020-m. «Spadziajusia, što vy da mianie nie pryjdziecie bližej da 2018 hoda (moža, da inšaha prezidenta), kab pieranieści terminy», — skazaŭ jon. Pry hetym kiraŭnik dziaržavy padkreśliŭ, što farsiravać terminy budaŭnictva ni ŭ jakim razie nielha — usio treba rabić «jakasna i prystojna».
Łukašenka taksama zapatrabavaŭ pry zabieśpiačeńni žyllom śpiecyjalistaŭ stancyi «nie adryvacca ad realij» i nie razdavać biaspłatnyja kvatery. Pavodle jaho słoŭ, unosiacca roznyja prapanovy dla zamacavańnia kadraŭ, ale «nijakaha vyłučeńnia być nie pavinna». «Tam zarpłata budzie prystojnaja ŭ rabaciah, siaredniaha i vyšejšaha źviana. Jak usiudy ŭ śviecie, takija śpiecyjalisty apłačvajucca vysoka. Tamu treba aryjentavacca na toje, što niejkija srodki jany ŭ stanie płacić za žyllo. Skažam, za arendnaje», — skazaŭ Łukašenka.
«Treba ludziam havaryć, što jany pryjduć na vielmi pierśpiektyŭnaje miesca pracy z dobraj zarpłataj, i my budziem padtrymlivać ich u hetym płanie. Ale treba nieści i sacyjalnuju nahruzku, i sacyjalnuju adkaznaść. Heta taksama nie treba zabyvać», — padkreśliŭ kiraŭnik dziaržavy.
Jon zajaviŭ, što pry padrychtoŭcy śpiecyjalistaŭ dla AES Biełaruś budzie aryjentavacca na vopyt Rasii. «Heta vielmi dobry i pieradavy vopyt u śviecie. Navučańnie treba budavać zychodziačy z vopytu Rasii, ale rabić heta bolš jakasna i adkazna», — skazaŭ Łukašenka.
Pavodle jaho słoŭ, pracavać na BiełAES buduć hałoŭnym čynam biełarusy, za vyklučeńniem klučavych śpiecyjalistaŭ, jakich buduć zaprašać. «My ich zaprašajem padčas budaŭnictva z-za miažy, hałoŭnym čynam z Rasii, bo heta — uzor rasijskaj stancyi», — skazaŭ kiraŭnik dziaržavy. Pa miery ŭvodu stancyi ŭ ekspłuatacyju rasijskija śpiecyjalisty, pavodle słoŭ Łukašenki, buduć zamiaščacca tymi, chto rychtavaŭsia ŭ biełaruskich VNU.
Z-za abjektyŭnych pryčyn u Biełarusi pakul niama mahčymaści rychtavać aśpirantaŭ i mahistraŭ u śfiery jadziernaj enierhietyki. U krainie pakul nie sfarmiravanaja navukovaja škoła pa ekspłuatacyi atamnaj elektrastancyi, kanstatavaŭ Łukašenka.
«Našy VNU viaduć padrychtoŭku śpiecyjalistaŭ, ale aśpirantaŭ i mahistraŭ my rychtavać nie možam, tamu što patrebnyja kadry vysokaj kvalifikacyi. U nas pakul takich ludziej ci niama, ci ich adzinki. Tamu my, vykarystoŭvajučy rasijski vopyt pracy na atamnaj stancyi rasijskaha ŭzoru, pavinny ŭsio ž aryjentavacca na padrychtoŭku kadraŭ vysokaj kvalifikacyi ŭ Rasijskaj Fiederacyi. Lišnich ludziej my tam rychtavać nie budziem, tamu što heta taksama mierapryjemstva nie tannaje, ale heta praces pieramoŭ», — adznačyŭ Łukašenka.
Pavodle jaho słoŭ, u Biełarusi napracavali kirunki padrychtoŭki śpiecyjalistaŭ. «My viedajem, jak heta rabić i za jakija hrošy», — zajaviŭ kiraŭnik dziaržavy.
Kamientary