Łukašenka: «Treba havaryć nie tolki pra kantrol za kanstytucyjnaściu narmatyŭnych pravavych aktaŭ u dziaržavie, ale i pra novyja śfiery dziejnaści suda».
Prezident Biełarusi Alaksandr Łukašenka ličyć nieabchodnym nadzialić Kanstytucyjny sud dadatkovymi paŭnamoctvami. Ab hetym jon zajaviŭ 3 sakavika, pryvodziačy da prysiahi sudździaŭ KS.
«Treba havaryć nie tolki pra kantrol za kanstytucyjnaściu narmatyŭnych pravavych aktaŭ u dziaržavie, ale i pra novyja śfiery dziejnaści suda», — padkreśliŭ prezident.
Pavodle jaho słoŭ, nadzialeńnie suda dadatkovymi paŭnamoctvami daść mahčymaść vyrašać samyja składanyja jurydyčnyja pytańni, jakija niepasredna źviazany jak z pravami i zakonnymi intaresami hramadzian, tak i z rabotaj dziaržaŭnych orhanaŭ.Jak adznačyŭ Alaksandr Łukašenka, jaho niepakoić, što, nakiroŭvajučy ŭ Kanstytucyjny sud lepšych śpiecyjalistaŭ, jany «mohuć pajści ŭ vuzkuju śfieru i ich viedy nie buduć u poŭnaj miery zadziejničany dla krainy».
Kiraŭnik dziaržavy pryniaŭ prysiahu šaści sudździaŭ Kanstytucyjnaha suda, paśla čaho ŭručyŭ novym sudździam padarunkavy ekzemplar Kanstytucyi. Prezident adznačyŭ, što ŭ novasfarmiravany skład suda ŭvajšli vysokakvalifikavanyja jurysty, jakija karystajucca zasłužanaj pavahaj u krainie.
«My čakajem ad vas efiektyŭnaj pracy pa ažyćciaŭleńniu kanstytucyjnaha kantrolu, adkaznaha, abdumanaha i ŭzvažanaha padychodu da pryniaćcia rašeńniaŭ», — skazaŭ biełaruski lider, źviartajučysia da sudździaŭ. «Budźcie viernyja pryniesienaj prysiazie, pryncypam sudziejskaha abaviazku, prafiesijnamu honaru i adkaznaści pierad biełaruskim narodam. Zaŭsiody pamiatajcie, što niaŭchilnaje vykanańnie pałažeńniaŭ Kanstytucyi — heta załoh palityčnaj stabilnaści hramadstva i ŭstojlivaha raźvićcia dziaržavy», — padkreśliŭ prezident.
Alaksandr Łukašenka adznačyŭ, što Kanstytucyjny sud abnaviŭsia, adnak tut nie adbyłosia «nijakaj kardynalnaj łomki, praktyčna pałavina składu sudździaŭ zachavałasia».
Važnym, na dumku kiraŭnika dziaržavy, źjaŭlajecca i toje, što «ŭ składzie suda jość žančyny, a heta nadaje stabilnaść luboj struktury».
Staršynia Kanstytucyjnaha suda Biełarusi Piotr Mikłaševič ličyć mahčymym stvaryć u KS dźvie pałaty pa 5 sudździaŭ u kožnaj. Nieabchodnaść takoha kroku, na jaho dumku, źviazana ź vialikim abjomam raboty ŭ sudździaŭ.
«Pry hetym treba dakładna raźmiežavać pytańni, što razhladajucca jak pałatami, tak i ŭsim składam KS», — adznačyŭ Piotr Mikłaševič 3 sakavika ŭ čas sustrečy prezidenta Biełarusi z sudździami Kanstytucyjnaha suda, paviedamili BIEŁTA u pres‑słužbie kiraŭnika dziaržavy.
Na dumku sudździ Alaksandra Maryskina, ekśpierty KS mahli b bolš aktyŭna pryciahvacca da raspracoŭki zakonaprajektaŭ i pravavoj ekśpiertyzy mižnarodnych pahadnieńniaŭ, da jakich płanuje dałučycca Respublika Biełaruś.
U liku inšych prapanoŭ, što pastupili ad sudździaŭ, — nadzialeńnie KS paŭnamoctvami pa vyniasieńniu pravavoj acenki dziejnaści vyšejšych słužbovych asob.
Źniavoleny raskazaŭ, jak siadzieŭ u kałonii ŭ Hłybokim u susiedniaj kamiery sa Statkievičam3
Kamientary