U 2016 hodzie Vierchni horad u Minsku płanujecca zrabić piešachodnaj zonaj
U 2016 hodzie Vierchni horad u Minsku płanujecca zrabić piešachodnaj zonaj, paviedamiŭ na pres-kanfierencyi 7 vieraśnia ŭ Minsku staršynia Minharvykankama Andrej Šorac.
Jon nahadaŭ, što raniej płanavałasia zrabić piešachodnaj vulicu Karła Marksa. «Pa vychadnych my zapaŭniali hetu vulicu kulturnymi masavymi mierapryjemstvami, što prynosiła niazručnaść žycharam hetaj vulicy. My viasnoj pryniali rašeńnie, što vulica Marksa nie budzie piešachodnaj», — rastłumačyŭ kiraŭnik Minharvykankama.
«Ciapier my adpracoŭvajem pytańnie ab zakryćci dla transpartu terytoryi Vierchniaha horada. My bačym, što heta daje peŭny vynik, kali my pravodzili i džazavyja fiestyvali, i muzyčnyja viečary. Heta tema zapatrabavanaja, ludzi heta aceńvajuć, im padabajecca. My, napeŭna, pryjdziem da taho, što zrobim Vierchni horad poŭnaściu piešachodnym i budziem na vychadnyja pravodzić tam mierapryjemstvy dla haradžan», — skazaŭ Šorac.
Pavodle jaho słoŭ, płanujecca źviazać Vierchni horad i z Trajeckim pradmieściem, i z parkam Horkaha. «Treba vybudavać pravilnuju łahistyku. My zacikaŭlenyja, kab usie byli zaniatyja: i baćki, i dzieci. Kab pracavali abjekty charčavańnia i čałaviek moh być uvieś dzień zaniaty. My ciapier hladzim naciahnutaść i niuansy, jakija ŭ nas byli, uličvajem usie niedachopy. Dumaju, u nastupnym hodzie zrobim hetu zonu adpačynku dla minčan i haściej stalicy», — skazaŭ Šorac.
Nakont raźvićcia sietki vieładarožak u stalicy i pryharadzie jon adkazaŭ: «My prapracoŭvali pytańnie ź Minskaj vobłaściu, kab vyjści ź vieładarožkami na niekatoryja trasy — u rajon Baraŭlanaŭ praciahnuć». Pavodle słoŭ Šorca, jon daručyŭ razhledzieć pytańnie ab pradaŭžeńni vieładarožki ad akvaparku «Labiažy» da Cnianki, kab ź minimalnymi zatratami vykarystoŭvać isnujučuju infrastrukturu aśviatleńnia i acanić, «kolki jašče kiłamietraŭ vieładarožak prakłaści». Jon taksama paviedamiŭ, što płanujecca pradoŭžyć na 5 km vieładarožku ŭ Łošyckim parku. «U najbližejšaj pierśpiektyvie pakul usio», — reziumavaŭ čynoŭnik.
Kamientary