Karatkievič nie choča vinšavać Łukašenku ź pieramohaj i budzie ŭdzielničać u parłamienckich vybarach
Paślavybarčaja pres-kanfierencyja eks-kandydatki ŭ prezidenty Taćciany Karatkievič prachodzić u restaranie na płoščy Niezaležnaści. Pačynajecca ź nievialikim spaźnieńniem, pačatkovyja słovy Karatkievič čytaje z papierki — vidać što stamiłasia za čas kampanii. Pramaŭlaje upeŭniena i, padajecca, z palohkaj. Asnoŭny mesidž — «my zmahli atrymać padtrymku ad 20 da 30% hramadstva» i «ciapier pačynajem nastupny etap».
Karatkievič amal adrazu zajaŭlaje, što źbirajecca ŭdzielničać u parłamienckich vybarach u jakaści kandydata ŭ deputaty. «My budziem rabić usio, kab ad słovaŭ ułada pierajšła da spravy», — havoryć Karatkievič.
Aficyjnych vynikaŭ vybaraŭ Karatkievič nie pryznaje i tamu, adpaviedna, vinšavać Łukašenku ź pieramohaj nie choča. Chacia i havoryć, što «za Łukašenku na hetych vybarach prahałasavała bolš ludziej, čym za mianie».
«Hetyja vybary stali pačatkam mirnych pieramien. Ja hatovaja iści napierad… Heta pieršaja pres-kanfierencyja majoj novaj vybarčaj kampanii», — havoryć Karatkievič žurnalistam.
«Ja sabrała ad 10 da 30% na roznych učastkach», — pierakananaja eks-kandydatka. «My źbiarem usie zaŭvahi, usiu infarmacyju ab parušeńniach i padadzim heta ŭ Viarchoŭny sud», — kiraŭnik štaba Karatkievič Andrej Dźmitryjeŭ nastrojeny vajaŭniča.
«Samaj hałoŭnaj pamyłkaj hetaj kampanii było toje, što my doŭha čakali adzinaha kandydata i nie rašalisia zrabić hety krok (samastojnaje vyłučeńnie Karatkievič). Heta samaje hałoŭnaje. Poźni start», — ličyć byłaja kandydatka ŭ prezidenty.
Kamientary