Statkievič pra zamarožańnie sankcyj: Heta pamyłkovaje i amaralnaje rašeńnie

Siońniašniaje rašeńnie Rady EZ ab prypynieńni na 4 miesiacy sankcyjaŭ adnosna Biełarusi «Svaboda» paprasiła prakamentavać byłoha palitviaźnia, eks-kandydata ŭ prezydenty Mikołu Statkieviča. Ź im hutaryŭ Jury Drakachrust.

Statkievič: Heta daŭno čakanaje rašeńnie. Ja bačyŭ heta pa nastrojach dyplamataŭ i eŭrapiejskich palitykaŭ. Heta reakcyja napałochanych ludziej, jakija vyrašyli achviaravać svaimi kaštoŭnaściami ŭ dačynieńni da Biełarusi.

Hetaje rašeńnie abciažaryć šlach Biełarusi da demakratyi. Heta pavinny zrabić sami biełarusy, i jany daŭno zrabili b heta lohka i spakojna, ale Łukašenka znachodzicca na ŭtrymańni Rasiei. Dziela svabody i demakratyi daviadziecca ryzykavać.

Łukašenka ŭvieś čas davodzić, što svaboda i demakratyja — tolki słovy i ich nidzie niama, u tym liku ŭ Eŭropie i ŭ ZŠA. My ž svaimi ŭčynkami, svaimi žyćciami davodzim, što heta najvyšejšyja kaštoŭnaści, za jakija možna płacić luby košt.

Siońnia da Łukašenki dałučylisia pradstaŭniki eŭrapiejskich krainaŭ, jakija ŭstali pobač z Łukašenkam i skazali — kaštoŭnaściaŭ, na jakich pabudavanyja našy krainy, u dačynieńni da Biełarusi niama. Ale heta nia spynić našuju baraćbu za hetyja kaštoŭnaści, bo my ŭ ich vierym i budziem vieryć.

RS: A čym praktyčna hetaje rašeńnie ŭskładnić žyćcio biełaruskaj demakratyi? Nu atrymaje Łukašenka i jahonyja paplečniki prava jeździć u Eŭropu. I na što heta paŭpłyvaje?

Statkievič: Ludzi vychodziać na Płošču dziela svabody i demakratyi, dziela spraviadlivaści. Jany ryzykujuć usim. A lidery krainaŭ, jakija ŭvasablajuć hetyja kaštoŭnaści, dajuć im syhnał — Łukašenka maje racyju, dla vas hetych kaštoŭnaściaŭ niama.

U praktyčnym planie heta aznačaje, što spadaru Łukašenku daduć tanny kredyt na «reformy». A jon ich skarystaje, kab zapabiehčy reformy. Bo nijakich reformaŭ pry im być nia moža.

Marnyja spadziavańni, što jany raźviernuć jaho ad Rasiei. Dahetul i nazaŭsiody hałoŭnym donaram Łukašenki źjaŭlajecca Rasieja, Kreml, Pucin. Jana płaciać jamu 10 miljardaŭ dalaraŭ u vyhladzie enerhietyčnych datacyjaŭ. Takoha nia daść nichto. Na hetyja hrošy jon apłačvaje straty, jakija prynosić jahony ekanamičny kałhas, trymaje samuju vialikuju palicyju ŭ śviecie pavodle kolkaści na dušu nasielnictva, apłačvaje 8 specsłužbaŭ. Pucin ciapier uśmichajecca i ščaślivy. Kali jamu padasca, što Łukašenka zahulaŭsia, jon skaža jamu čaroŭnaje słoŭca — suśvietnyja košty na haz i naftu, i na nastupny dzień Łukašenka budzie stajać na kaleniach la Kramla. Heta pamyłkovaje i amaralnaje rašeńnie.

Ale ŭ im jość maleńkaja praktyčnaja karyść. 4 miesiacy spadar Łukašenka musić uzvažvać dziejańni svaich šmatlikich siłavych strukturaŭ, strymlivać ich, jak heta było apošni miesiac. Heta stvaraje «akno mahčymaściaŭ», jakim my možam skarystacca.

• 0
• 0
• 0
• 0
• 0
• 0
• 0
• 0