Biełaruś z 2016 hoda maje namier pierajści na indykatyŭnuju sistemu płanavańnia ekanomiki. Adpaviedny prajekt zakona ŭžo raspracavany i moža być razhledžany na vosieńskaj siesii biełaruskaha parłamienta.
Dakumient praduhledžvaje pierachod ad dyrektyŭnaj sistemy płanavańnia ekanomiki da indykatyŭnaj, što faktyčna aznačaje admovu dziaržavy ad praktyki daviadzieńnia ministerstvam i subjektam haspadarańnia abaviazkovych dla vykanańnia prahnoznych pakazčykaŭ.
Prajekt zakona ab indykatyŭnym płanavańni moža być razhledžany deputatami biełaruskaha parłamienta na vosieńskaj siesii ŭ pakiecie ź inšymi dakumientami (u pryvatnaści, biudžetam), što vyznačajuć ekanamičnuju palityku na 2016 hod.
Adznačym, što staršynia pałaty pradstaŭnikoŭ Uładzimir Andrejčanka, adkryvajučy vośmuju siesiju biełaruskaha parłamienta, 2 kastryčnika źviarnuŭ uvahu na nieabchodnaść pierachodu dziaržavy na indykatyŭnuju sistemu płanavańnia ekanomiki.
«Pry ŭsioj važnaści vałavych pakazčykaŭ u pytańniach płanavańnia na pieršaje miesca treba stavić prybytak i rentabielnaść. Indykatyŭnaje płanavańnie zaklikanaje dapamahčy pradpryjemstvam, halinam i rehijonam bolš aktyŭna vykarystoŭvać svaje kankurentnyja pieravahi, realizoŭvać ekspartny patencyjał», — skazaŭ Andrejčanka.
Na dumku ekśpiertaŭ, zapłanavany pierachod da indykatyŭnych pakazčykaŭ śviedčyć ab tym, što dyrektyŭny padychod da kiravańnia ekanomikaj dakazaŭ svaju nieefiektyŭnaść.
«Vopyt papiarednich hadoŭ pakazaŭ, što kali my ŭstanaŭlivajem dyrektyŭnyja pakazčyki i pačynajem ich vykonvać, nie ŭličvajučy kanjunkturu na ŭnutranym i źniešnim rynkach, rastuć składskija zapasy. Tamu zusim łahična, što staryja padychody nieabchodna pierahladać», — ličyć navukovy dyrektar Daśledčaha centra IPM Iryna Tačyckaja.
Razam z tym, ličyć ekanamist, bolš hnutki padychod da padrychtoŭki aficyjnych prahnozaŭ jašče nie harantuje taho, što kraina adydzie ad płanavaj ekanomiki.
«Prahnoz nie pierastanie być płanam datul, pakul nie pierastanuć patrabavać ad ekanamičnych ahientaŭ vykanańnia zaćvierdžanych aficyjnych pakazčykaŭ», — reziumavała Tačyckaja.
Nahadajem, Alaksandr Łukašenka 11 kastryčnika paśla hałasavańnia na vybarčym učastku № 1 u Minsku zajaviŭ žurnalistam, što hatovy na lubyja pieraŭtvareńni i reformy.
U toj ža čas jon skazaŭ, što nie maje namieru adychodzić ad svajho hałoŭnaha pryncypu kiravańnia dziaržavaj. «Usio pavinna być spakojna, biez revalucyj, asabliva ŭ ekanomicy, — pierakanany Łukašenka. — Ja hetu ekanomiku nie tolki vyvučaŭ užo ŭ stałym uzroście, ale i pamacaŭ rukami. Ekanomika nikoli nie pacierpić, kali ty jaje budzieš łamać praz kalena».
Kiraŭnik dziaržavy adznačyŭ, što 20 hadoŭ «išoŭ evalucyjnym šlacham», jaki kali «nie adrazu vyviedzie na vyniki, ale nie baluča budzie narodu».
Łukašenka zajaviŭ, što «hatovy na lubyja mierapryjemstvy i lubyja reformy». «Ale ci vytrymajecie vy heta? Ci treba vam heta? Hatovy zrabić tak, jak žadajecie. Nichto nie moža papraknuć mianie, što ja dziejničaŭ usie hetyja hady nasupierak žadańniu naroda. Kali daście kart-błanš na lubuju łomku i kardynalnyja pieraŭtvareńni, ja heta zrablu. Ale lepš iści evalucyjnym šlacham», — padkreśliŭ jon.
Kamientary