U Biełarusi stvarajecca respublikanski vodna-bałotny zakaźnik «Bieły Moch». Heta praduhledžana pastanovaj Savieta ministraŭ № 883 ad 21 kastryčnika, paviedamiła pres-słužba ŭrada.
Zakaźnik «Bieły Moch» ahulnaj płoščaj 887,55 ha raźmieščany ŭ Astravieckim rajonie Hrodzienskaj vobłaści. Jaho stvarajuć dla zachavańnia ŭ pryrodnym stanie kaštoŭnych lesa-bałotnych ekałahičnych sistem, dzikarosłych raślin i dzikich žyvioł, jakija adnosiacca da vidaŭ, uklučanych u Čyrvonuju knihu Biełarusi, a taksama miescaŭ ich vyrastańnia i pražyvańnia.
Na terytoryi zakaźnika zabaraniajecca pravodzić raboty pa hidratechničnaj mielijaracyi i źmianieńni hidrałahičnaha režymu, raźviedcy i raspracoŭcy radoviščaŭ karysnych vykapniaŭ, raźmiaščać adchody (za vyklučeńniem časovaha zachoŭvańnia ŭ sankcyjanavanych miescach), źniščać ci paškodžvać draŭninna-chmyźniakovuju raślinnaść, vypalvać suchuju travu. Pastanovaj taksama zamacavanyja inšyja zabarony, jakija datyčacca praviadzieńnia roznych rabot (u tym liku budaŭničych) u zakaźniku.
Režym achovy i vykarystańnia zakaźnika «Bieły Moch» uličvajecca pry raspracoŭcy prajektaŭ i schiem ziemleŭparadkavańnia, lesaŭparadkavańnia i mielijaracyi ziamiel, horadabudaŭničych prajektaŭ i prahram sacyjalna-ekanamičnaha raźvićcia Astravieckaha rajona.
Zakaźnik abvieščany biez vyklučeńnia ŭ karystalnikaŭ ziamielnych učastkaŭ. Ziemlekarystalniki abaviazanyja vykonvać pryrodaachoŭny režym novaha zakaźnika.
Astravieckamu rajvykankamu daručana na praciahu šaści miesiacaŭ zarehistravać zakaźnik i ŭstanavić na jaho miežach śpiecyjalnyja infarmacyjnyja znaki.
Pastanova nabyła moc paśla jaje aficyjnaha apublikavańnia.
Kamientary