Minharvykankam dazvoliŭ akcyju u pamiać ab achviarach stalinskich represij u Łošycy
Minharvykankam dazvoliŭ praviadzieńnie 8 listapada tradycyjnaj akcyi ŭ Łošycy ŭ pamiać ab achviarach stalinskich represij, prymierkavanaj da dnia paminańnia prodkaŭ «Dziady». Pra heta BiełaPAN paviedamiŭ namieśnik staršyni Kansiervatyŭna-chryścijanskaj partyi — BNF Juryj Bieleńki.
Zbor udzielnikaŭ akcyi budzie prachodzić z 12.00 da 12.30 kala pałaca kultury «Łošycki». Zatym, u 12.30, pačniecca šeście da Łošyckaha jara, dzie kala pamiatnaha znaka ŭ honar niavinna rasstralanych z 13.30 da 15.00 adbudziecca mitynh. Zajaŭlenaja kolkaść udzielnikaŭ akcyi — da 500 čałaviek.
Na takim ža mitynhu ŭ Łošycy ŭ 2011 hodzie prahučała infarmacyja pra toje, što niepadalok ad miesca rasstrełu represavanych znachodziłasia tak zvanaja «biełaja dača», dzie ŭ 1930-ch źmiaščałasia śpieckamanda NKUS. Tudy dastaŭlali pierabiežčykaŭ z Zachodniaj Biełarusi, i ŭ Łošyckim jary ich rasstrelvali.
Pavodle Zianona Paźniaka, u Łošyckim jary było rasstralana kala 10 tysiač čałaviek. «Paśla taho jak my praviali raskopki ŭ Kurapatach, my sabralisia pravieści raskopki i ŭ Łošyckim jary. Daviedaŭšysia pra heta, tahačasnaja kamunistyčnaja ŭłada pryniała rašeńnie zasypać Łošycki jar, pabudavać na hetym miescy haražy i zaasfaltavać terytoryju. Adnak nikomu nie ŭdasca schavacca ad histaryčnaj adkaznaści», — źviartaŭsia tady ŭ liście da ŭdzielnikaŭ mitynhu Zianon Paźniak.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary