Ministr kultury RF: Ivan Žachlivy — naščadak impieratara Aŭhusta
Śmiełyja zajavy ministra kultury Rasii Uładzimira Miadzinskaha nie pieršy raz prymušajuć čyrvanieć rasijskich historykaŭ i prosta bolš-mienš adukavanych ludziej.
Hetak, letam 2015 hoda jon, abaraniajučy saviecki histaryčny mif pra «28 panfiłaŭcaŭ», zajaviŭ, što archiŭnyja supracoŭniki nie pavinny zmahacca z histaryčnymi falsifikacyjami, i ŭvohule nie treba abmiarkoŭvać hetyja padziei.
Replika była vyklikana tym, što Dziaržaŭny archiŭ RF apublikavaŭ materyjały śledstva savieckaj vajennaj prakuratury ad 1948 hoda, jakija davodzili, što nijakaj faktyčnaj asnovy pad historyjaj pra hieraičnuju abaronu Maskvy ad niamieckich tankaŭ 28 žaŭnierami, niama.
Ale jašče bolš cikavaje histaryčnaje adkryćcio rasijski ministr zrabiŭ u kancy kastryčnika na Frankfurckim knižnym kirmašy padčas dyskusii «Rasija i Jeŭropa — adna historyja, roznaje asensavańnie».
Sprabujučy davieści, što historyja i kultura Rasii majuć, jak i jeŭrapiejskaja kultura, staražytnahreckija i rymskija karani, Miadzinski spasłaŭsia na Ivana Žachlivaha:
«U svoj čas rasijski car Ivan Žachlivy zamaŭlaŭ śpiecyjalnaje hienieałahičnaje daśledavańnie, ź jakoha vynikała, što jon źjaŭlajecca pramym naščadkam impieratara Aŭhusta Aktavijana».
Miadzinski dalej raspavioŭ, jak takoje zdaryłasia:
«Aŭhust Aktavijan šmat vajavaŭ, skončyŭ svaje vojny ŭ Jehipcie. U Jehipcie ŭ jaho byŭ syn, jaki potym chitrym šlacham dabraŭsia da Skandynavii, a potym ź vikinhami — na Ruś».
«Takim čynam, ideałahiema «Maskva-treci Rym» mieła i niepasrednaje hienietyčnaje paćviardžeńnie», — skončyŭ Miadzinski.
Zhodna z ahulnapryniataj historyjaj Aktavijan Aŭhust pamior u 14 hodzie paśla Rastva Chrystova, pra jahonych synoŭ ničoha nie viadoma.
Pra jakija «hienietyčnyja» dokazy kazaŭ Miadzinski, taksama nie zrazumieła. Vierahodna, rasijski ministr prosta błytaje hienietyku i hienieałohiju (niachaj i fantastyčnuju).
***
Uładzimir Miadzinski — prafiesar prestyžnaha Maskoŭskaha dziaržaŭnaha instytuta mižnarodnych adnosin, doktar histaryčnych navuk i staršynia Rasijskaha vajenna-histaryčnaha tavarystva.
Jahonyja knihi vyklikali da žyćcia źjaŭleńnie sieryi publikacyj «Anty-Miadzinski», u jakich prafiesijnyja historyki nie pakinuli ad «histaryčnych» tvoraŭ ministra kamienia na kamieni.
Ministr taksama adznačyŭsia napisańniem histaryčnaha ramana «Ściana» pra abaronu Smalenska ad vojsk Rečy Paspalitaj u 1609-1611 hadach. U ramanie, akramia taho, što prodki biełarusaŭ i palakaŭ demanizavanyja, a maskoŭcy idealizujucca, karol i vialiki kniaź Žyhimont bačyć son, u jakim simvalična apisanaja katastrofa, u jakoj zahinuŭ pad Smalenskam prezident Polščy Lech Kačyński. Historyja taho času pakazanaja jak ahresija Katalickaha kaścioła i Zachadu ŭ cełym suprać maralna čystaj pravasłaŭnaj Maskovii.
Kamientary