U Ivacevičach kiroŭcu, jaki ŭciakaŭ ad supracoŭnikaŭ DAI, spynili strełami pa kołach aŭtamabila.
Jak paviedamili ŭ adździaleńni pa ahitacyi i prapahandzie DAI UUS Bresckaha abłvykankama, 18 listapada prykładna ŭ 0.05 na vulicy Lenina supracoŭniki asobnaha śpiecyjalnaha ŭzvoda «Buh» darožna-patrulnaj słužby DAI UUS, jakija ažyćciavili nahlad za biaśpiekaj darožnaha ruchu, źviarnuli ŭvahu na aŭtamabil «Aŭdzi 80», jaki vyjechaŭ na hetuju vulicu. Kiroŭcu byŭ dadzieny sihnał spynicca. Aŭtamabilist nie vykanaŭ patrabavańnie i pačaŭ uciakać.
Byŭ arhanizavany pieraśled «Aŭdzi», padčas jakoha supracoŭniki DAI praz hučnahavaryciel nieadnarazova patrabavali ad kiroŭcy spynicca, ale toj nie padparadkoŭvaŭsia i stvaraŭ avaryjnyja situacyi, ujaŭlajučy realnuju pahrozu žyćciu i zdaroŭju ŭdzielnikaŭ darožnaha ruchu.
Na vulicy Hamalickaha supracoŭnik DAI papiaredziŭ kiroŭcu pra mahčymaść vykarystańnia zbroi dla spynieńnia transpartnaha srodku, ale toj praciahvaŭ na vialikaj chutkaści ŭciakać.
Spačatku było zroblena dva papieradžalnyja streły ŭ pavietra, zatym čatyry streły pa zadnim levym kole «Aŭdzi».
Paśla hetaha transpartny srodak byŭ spynieny, kiroŭcy zatrymali. Heta byŭ 17-hadovy navučeniec adnoj sa škoł horada, jaki nie maje pravoŭ kiroŭcy.
U dačynieńni da parušalnika składziena šeść administracyjnych pratakołaŭ, u tym liku za kiravańnie transpartnym srodkam asobaj, jakaja nie maje prava kiravańnia i za nieadnarazovaje nievykanańnie patrabavańnia ab spynieńni transpartnaha srodku.
Aŭtamabil dastaŭleny na štrafstajanku.
Kamientary