Minpracy: Płan pa stvareńni biezbarjernaha asiarodździa pieravykanany

Płan pa stvareńni biezbarjernaha asiarodździa pieravykanany, paviedamiŭ namieśnik ministra pracy i sacyjalnaj abarony Alaksandr Rumak na pres-kanfierencyi ŭ Minsku 30 listapada.

Pavodle jaho słoŭ, z 2007-ha pa 2014 hod było zapłanavana stvaryć biezbarjernaje asiarodździe prykładna na 10 tys. abjektaŭ, a stvorana jano bolš jak na 18,5 tys. abjektaŭ. 

Razam z tym namieśnik ministra adznačyŭ, što ad hramadskich abjadnańniaŭ invalidaŭ pastupajuć pytańni ab jakaści biezbarjernaha asiarodździa. Pavodle słoŭ Rumaka, heta adbyvajecca «z-za adsutnaści adzinych patrabavańniaŭ pa acency stanu dastupnaści». 

«Haspadary budynkaŭ, — skazaŭ Rumak, — časam robiać pandus z krutym padjomam. Čałavieku, jaki samastojna pieramiaščajecca na invalidnaj kalascy, ciažka zabracca na taki pandus. Jość prykłady, kali čałaviek padymajecca na placoŭku, a tam na jaho dźviery adčyniajucca. Heta niedapuščalna. My imkniemsia razam z abjadnańniami invalidaŭ adsočvać takija fakty i patrabujem, kab heta było źmieniena».

Stvareńnie biezbarjernaha asiarodździa Rumak nazvaŭ vielmi važnym: «Kožny čałaviek niezaležna ad stanu zdaroŭja maje prava paŭnacenna ŭdzielničać u žyćci hramadstva, karystacca stvoranymi ŭ im vyhodami. Heta i pasłuhi transpartu, i spartyŭnyja kulturnyja zbudavańni, i handal. Adnak stvareńnie biezbarjernaha asiarodździa patrabuje šmat srodkaŭ». 

Rumak adznačyŭ, što ŭ krainie stvoranaja sistema płanavańnia i kantrolu ŭładkavańnia biezbarjernaha asiarodździa na novych abjektach. Adnak u budynkach, jakija ŭźviedzienyja raniej i nie adpaviadajuć patrabavańniam biezbarjernaha asiarodździa, technična składana zabiaśpiečyć dastupnaść.

Zaraz raspracoŭvajecca dziaržaŭnaja prahrama ab sacyjalnaj abaronie i sadziejničańni zaniataści na 2016—2020 hady i padprahrama «Biezbarjernaje asiarodździe žyćciadziejnaści invalidaŭ i fizična asłablenych asob». Dakumientam praduhledžvajecca kompleksny padychod da stvareńnia biezbarjernaha asiarodździa, kab na ŭsim maršrucie čałavieka ź invalidnaściu było stvoranaje biezbarjernaje asiarodździe. Razmova idzie ab panižeńni vyšyni bardziurnych kamianioŭ, dastupnaści nizkapadłohavaha transpartu (takija charaktarystyki majuć 35% hramadskaha transpartu) i hetak dalej. 

Heta praciahłaja praca, jakaja patrabuje kaardynacyi ŭsich dziaržaŭnych orhanaŭ, adznačyŭ Rumak.

• 0
• 0
• 0
• 0
• 0
• 0
• 0
• 0